زرگزرانی سوگوی نا سفر اٹ ایشیائی شونداری بینک نا کمک نا منتوار اُن،بنجائی وزیر خزانہ

اسلام آباد، بنجائی وزیر خزانہ و بنگ سینیٹر محمد اورنگزیب پارینے کہ یوروبانڈ انا سرسہب جاری کننگ آن کریڈٹ ریٹنگ نا جہانی ایجنسی، جہانی مالیاتی منڈی و زرکار آتا بحال مروک آ پت انا ڈیک مننگ ءِ، پنجرہ ئی اصلاحات مدامگی اقتصادی سوگوی نا سفر نا اسہ اہم ءُ بشخ اسے، زرگزرانی سوگوی نا سفر اٹ پاکستان ایشیائی شونداری بینک انا کمک، مخ تف و کمکاری آ منت وار ءِ۔ پنچ شنبے نادے آ ایشیائی شونداری بینک انا کنڈ آن پاکستان اٹ مالی مدامگی کن ٹیکسیشن نا سرحال آ بڑزکو کہولی ڈائیلاگ دود آن تران کرسا بنجائی وزیر خزانہ پارے کہ پاکستان جہانی کیپٹل مارکیٹ اٹ اِرا قسط آتیا تالان 3 ارب ڈالر مالیت نا یوروبانڈز جاری کرینے ہرا ملکی تاریخ اٹ اسہ ٹرانزیکشن نا کمک اٹ جہانی کہول آ فنڈ یکجا کننگ نا کل آن بھلا ریکارڈ ءِ، دا کریڈٹ ریٹنگ نا مسہ جہانی ایجنسی تا کنڈ آن پاکستان نا کریڈٹ ریٹنگ اٹ گچینی آن پد جہانی مالیاتی ادارہ و زرکار آتا کنڈ آن پاکستان نا زرگزران و مدامگی زرگزرانی گام گیج آتیا پت انا درشانی ءِ۔ وزیر خزانہ پارے کہ یوروبانڈز اکن جہانی زرکار آتا کنڈ آن کم وود 6 ارب ڈالر نا سلاہ رسینگا ہرا جاری مروک بانڈز انا مالیت آن کم وود دوکچ زیات ءِ، داکان بیدس ٹرانزیکشن اٹ دنیا نا جتا ڈیہہ، ایشیاء، نیامی دے ٹک، یورپ، امریکہ غان تعلقدار جتا جتا ادارہ ئی زرکار آک استخواہی نا درشانی ءِ کریر، ہرا جہانی مالیاتی منڈی تیٹی پاکستان آ زرکار آتا بحال مروک پت انا اہم ءُ چیدہ اسے۔ وزیر خزانہ پارے کہ تہہ انا مالیات نا بشخ اٹ اصلاحات نا ہرا عمل نا بناءِ کننگاسس، ہمو وڑ پیشن نا مالیات اٹ ہم گام گیج کننگانے و مسہ سال انا تجدید کروک گلوبل میڈیم ٹرم نوٹ پروگرام نا رداٹ اولیکو بانڈ ءِ جاری کننگانے۔