السی ویل آتا ایسری کن کل وسیلہ غاتے کاریم اٹ اتنگ اُن، وزیراعلیٰ

کوئٹہ، وزیراعلیٰ بلوچستان میر سرفراز بگٹی تون مسکوہی ڈپٹی اسپیکر بلوچستان اسمبلی سردار بابر خان موسیٰ خیل و قبائلی راہشون سردار محمد حنیف خان موسیٰ خیل اوڑدہی کریر۔ اوڑدہی ٹی صوبہ نا جم سیاسی و راجی حالیت، موسیٰ خیل تون اوار ایلو علاقہ غاتیٹی برجا شونداری گام گیج و الس ءِ مون تروک ویل آتتون اوار تین پہ تینی استخواہی تا چندی باندات آتیا گپ وتران کننگا۔ داوخت آ وزیراعلیٰ میر سرفراز بگٹی پارے کہ حکومتِ بلوچستان صوبہ نا کل علاقہ غاتا بریبر شونداری و الس ءِ بنداوی آسراتی تا فراوانی کن گام گیج کننگ اٹی ءِ‘ پدتموک علاقہ غاتے ٹی شونداری کاریم تے ترند کننگ حکومت نا اولیکو اولیت آتے ٹی اوار ءِ‘ او پارے کہ السی ویل تا ایسری و شونداری ڈٹ آتا وخت آ پوروی کن کل دوئی وسیلہ غاتے کاریم اٹ اتنگ انگ ءِ‘ وخت اس کہ مر انگا پدتموک علاقہ غاتے ہم شونداری نا کسر اٹی اوار کننگ آ خصوصی چکار کننگ انگ ءِ۔ سردار بابر خان موسیٰ خیل و سردار محمد حنیف خان موسیٰ خیل وزیراعلیٰ ءِ تینا علاقہ نا السی ویل و گرج آتا بابت معلومدار کریر‘ ہرافتا ایسر کن وزیراعلیٰ تعلقدار کمامدار آتے دمدستی و المی اقدامات نا پارت کرے۔ اوڑدہی ٹی صوبہ ٹی امن وسوگوی‘ السی آسودہی و شونداری عمل نا بابت ہم گپ وتران کننگا۔