گڈانی ءِ پوسکن و چاگڑد دوست شپ ری سائیکلنگ مرکز اس جوڑکینہ،بنجائی وزیر بحری باندات

اسلام آباد، بنجائی وزیر بحری باندات محمد جنید انوار چوہدری پارینے کہ گڈانی ٹی شپ بریکنگ انڈسٹری ءِ پوسکن و چاگڑد دوست شپ ری سائیکلنگ ہند اسے ٹی بدل کننگ کن 12 ارب روپئی نا ڈٹ آ عملی کاریم بناکرینے۔ اوداہیت ءِ گڈانی شپ بریکنگ اینڈ ری سائیکلنگ انڈسٹری نا پوسکنوڑی‘ اپ گریڈیشن و تعلقدار آسراتی تا شونداری نا بابت اسٹیئرنگ کمیٹی نا دیوان نا کماشی ءِ کرسا پارے۔ بنجائی وزیر ءِ حوال اٹی پاننگاکہ ڈٹ انا رداٹ 30 کٹ آتیا تالان ہسپتال، اسکول، مزور کالونی و سولر انرجی آسراتی تا جوڑ کننگ بناکرینے۔ بنجائی وزیر بحری باندات پارے کہ گڈانی ملکی بحری زرگزران و اسٹیل اسکریپ مارکیٹ اٹی اہم کڑد ادا کیک، ولے روایتی شپ بریکنگ وڑوڈول تے رکھ، پوسکن و چاگڑد دوست شپ ری سائیکلنگ نظام اٹ بدل کننگ وخت انا گرج ءِ۔ اوپارے کہ ڈٹ اٹی طبی کارندہ غاتیکن ہنکین، مزور کالونی، پبلک پارک و کم و ود 32 کلومیٹر سڑک آتا تفنگ ہم اوار ءِ وخت اس کہ صنعتی و خطرناک کھدکتر نا کوڑی و تلفی کن آسراتی، فائر اینڈ ریسکیو سروسز و دِیر انا فراوانی و ٹریٹمنٹ نا نظام اس ہم جوڑ کننگک۔ بنجائی وزیرپارے کہ پوسکنوڑی نا عمل اٹی مزور آتا جان جوڑی، رکھ و آسودہی ءِ بنجائی وڑ بایدے دوئی مرے۔ گڈانی ءِ زموار شپ ری سائیکلنگ نا ہندن ءُ ماڈل اس جوڑ کننگ ءِ ہراڑے زرگزرانی سرگرمی، مزور آتا رکھ و چاگڑدی مدامگی تون اوار اوار مونی کار۔ اوپارے کہ گڈانی نا اپ گریڈیشن آن سرکلر اکانومی ءِ ہم مون آ دننگک انتئے کہ بیکار بحری جہاز آتیان اسٹیل و ایلو مواد آتا گچین کاریم اٹ اتنگ مننگ کیک۔ اوپارے کہ شپ ری سائیکلنگ بیرہ بحری بشخ انا سرجز اف بلکن اونا دراست تعلقداری اسٹیل اسکریپ نا زرگزران، روزگار و صنعتی سپلائی چین اتون ءِ۔ حکومت مالی سال 2026-27نا بنجائی پبلک سیکٹر ڈویلپمنٹ پروگرام نا رداٹ ڈٹ آتیکن 78 کروڑ روپئی جتا کرینے۔ وزیرپارے کہ پوسکنوڑی پروگرام نا مسخت گڈانی ٹی شپ ری سائیکلنگ نا وڑوڈول ءِ ہانگ کانگ انٹرنیشنل کنونشن فار دی سیف اینڈ انوائرنمنٹلی ساؤنڈری سائیکلنگ آف شپس نا خواست اتٓتون ہم گرنچ کننگ ہم ارے۔ اوپارے کہ ہانگ کانگ کنونشن رکھ و چاگڑد دوست شپ ری سائیکلنگ کن جہانی آب پک کرینے ہنداسوب آن گڈانی ٹی خطرناک مواد آتا انتظام، مزور آتا رکھ و چاگڑدی سلامتی تون اوار کل بشخ آتیٹی جہانی خواست آتے مون آ تخنگے۔ بنجائی وزیر تعلقدار کمامدارآتے ڈٹ آکاریم نا رفتار ءِ برجا تخنگ و پوسکن تفنگوک کل آسراتی تیٹی درکار رکھی، چاگڑدی و آپریشنل آب آتے پک کننگ نا پارت کرے۔