ایران آبنائے ہرمز اٹی پین بحری بارودی سرنگ تالان کرینے،ترجمان خاتم الانبیاء ہیڈکوارٹر

تہران، ایران نا کنڈ آن دعویٰ کننگانے کہ او آبنائے ہرمز اٹی پین بحری بارودی سرنگ تالان کرینے۔ ایرانی سلہہ بند فوج انا آپریشنل کوآرڈینیشن نا زموار خاتم الانبیاء بنجائی ہیڈکوارٹر نا ترجمان ابراہیم ذوالفقاری نا سوشل میڈیا پلیٹ فارم ایکس آ جاری مروک بیان اٹی پاننگانے کہ نن نا کارروائی تا وخت آ آبنائے ہرمز نا سویل اٹی کانود آن چَپ دیری کسر تے پورو وڑ اٹ بند کرین و پین بارودی سرنگ تالان کرین۔ ابراہیم ذوالفقاری امریکی صدر ڈونلڈ ٹرمپ نا کنڈ آن آبنائے ہرمز نا ءِ پن بدل کرسا اودے ‘آبنائے ٹرمپ’ تخنگ آ ہم بھاز ملنڈ کرے۔ او دعویٰ کرے کہ دا گام انا ورندی ٹی نیامی دے ٹِک اٹی امریکی فوجی کارروائی تا چاروکی کروک امریکی سینٹرل کمانڈ (سینٹکام) بیرہ فوٹوشاپ نا کمک اٹ آبنائے نا پن ءِ بدل کننگ کیک۔ او واشنگٹن آملنڈ کرسا پارے کہ ویل ایسر مس، داسہ امریکہ فوٹوشاپ نا کمک اٹ تیل دروک جہاز آتے ہم دا کسر آن گدریفنگ کیک۔ دا بیان واشنگٹن و تہران نا نیام اٹی ودوک آ چک و تاڑ نا وخت مونی بسنے۔ داکان مست سینٹکام کونسل پاریسس کہ سمندری ہن و بر انا کل کسر تیان بحری بارودی سرنگ آتے اینک کننگانے، و تیل بردار جہاز آتا سرنگ آتتون ڈوک لگنگ نا حوال آتے دروغ گونداسس۔ ایران نا پاسدارانِ انقلاب دعویٰ کریسس کہ اِرا تیل بردار بحری جہاز، ہرافتا کارندہ غاتے امریکی فوج انا پاننگ آ دڑفنگاسس وہمو جہاز آک کانود آن چَپ کسر آن گدرینگ کن امریکی تا واک اٹ تننگاسر، داسہ بارودی سرنگ تون ڈوک لگنگ ناسوب آن ترخار واوفتے خاخر لگا۔ بیان اٹی پاننگاسس کہ داکان مست پاسدارانِ انقلاب نا بحریہ بارودی سرنگ تالان کروک کسر تیان گدرینگ نا خطرہ غاتا بابت خبڑدار کریسس۔ پاسدارانِ انقلاب نا بیان اٹی مستی پاننگا کہ ہرا بحری کمپنیک کانود کسر نا جاگہ غا امریکہ نا مکار آ دلاسہ غاتیٹی بریرہ و تینا جہانی جہاز آتے دشمن نا واک اٹی ایترہ۔ اوفتیکن ودکی سزا ہم پک کننگانے ہرافتیا زوت عملدرآمد مریک۔