دھرنا الس نا فائدہ کن ئس، حکومت تون ہیت و گپ ءِ برجا تخنگ کن تیار اُن،حافظ نعیم الرحمن

لاہور، حکومت و جماعت اسلامی نا نیام اٹی مذاکرات سرسہب مس، ہڑتوم آ کنڈ آک اسہ ایلو نا سلاہ تے بننگ و آخبت نا لائحہ عمل ٹہیفنگ کن مذاکراتی کمیٹی جوڑ کننگ آ امنا کرسا پاریر کہ الس ءِ آسودہی تننگ کن گچین سلاہ تیان فائدہ ہرفسا گام گیج کننگک۔ بنجائی وزیر احسن اقبال و رانا ثناء اللہ جماعت اسلامی نا ڈل اتون مذاکرات آن پد حافظ نعیم الرحمن تون اوار پریس کانفرنس کریر۔ احسن اقبال پارے کہ حکومت السی ویل آتا ایسری کن است انا سِخت اٹ گام گیج کننگ اٹی ءِ۔ جماعت اسلامی نا تحریک السی آسودہی کن ءِ و ننا ہم ہندا کوشست ءِ کہ الس ءِ زیات آن زیات آسودہی تننگے۔ نن دا رد اٹ جماعت اسلامی نا مذاکراتی ٹیم اتون ہیت و گپ کننگ کن تیار اُن۔ او پارے کہ ملکی فائدہ ءِ کل آن اولیت تروئی تمک‘ بایدے ہندن حالیت جوڑ مف ہراڑان دشمن ءِ فائدہ ہرفنگ نا وارخواہی رسینگے۔ او پارے کہ حافظ نعیم الرحمن باور کرفے کہ دھرنا تا وخت آ ہچ ءُ خارتس کارروائی اس کننگپک، وخت اس کہ حکومت اونا سلاہ تے بننگ کن اسہ کمیٹی اس ٹہیفینے۔ نن خوانہ کہ جماعت اسلامی ہم اسہ کمیٹی اس ٹہیفے ہرا حکومتی مذاکراتی کمیٹی ءِ پیٹرولیم لیوی ٹی کمتی و کبینی نا توننگ کن سلاہ ایتے۔ حکومت دا سلاہ تیا پورو وڑ اٹ عملدرآمد کیک او پارے کہ حکومت ءِ ڈیہہ اٹی تالان چک وتاڑ نا سوب آن مروک کبینی و داڑان لس بندغ ءِ مون تروک بھلا خواری تا جوان سماءِ۔ الس ءِ آسودہی رسیفنگ کن کوشست کننگ انگ ءِ۔ دا وخت آ رانا ثناء اللہ پارے کہ جماعت اسلامی پارینے کہ اوفتون ہندن ءُ سلاہ ہرافتیا عمل کرسا لس بندغ ءِ آسودہی تننگ مریک۔ نن اوفتے بخیر پارسا منتواری ہم ہرفینن۔ او پارے کہ حکومت ہرا لس بندغ نا آسودہی کن کوشست کننگ اٹی ءِ‘ دا ہرا سلاہ تے تسر او حکومت کن ہمو گام گیج آتے ٹی کمکار مریرہ ہرافتے الس نا آسودہی کن کننگ انگ ءِ‘ او پارے کہ داڑان مست ہم جماعت اسلامی نا سلاہ تیان حکومت فائدہ ہرفنگ اٹی ءِ۔ جماعت اسلامی نا سروک حافظ نعیم الرحمن پارے کہ حکومت نا کنڈ آن بروک آ ڈل اتون مذاکرات سرسہب مسنے‘ ننا دھرناتے اینو 19 دے مسنے‘ 15 آن 20 ہند آتیٹی دا دھرناک برجا ءُ، و الس نا اواری ہم ہڑدے نابنداو آ ودنگ اٹی ءِ۔ ننا دا دھرناک جندی مسخت کن افس بلکن السی فائدہ ننا بنجائی ایجنڈاءِ۔ او پارے کہ کبینی نا سوب آن لس بندغ نا زند عذاب مسنے، 95 درسَد بندغ آک دا وخت آ تینا بنداوی آسراتی و زندا نا گرج آتے پورو کننگ کن فریشان ءُ۔ تدوک آ منہ وخت اٹی کبینی ٹی 33 درسَد نا ودکی مسنے، کل آن زیات کبینی پنجاب اٹی مسنے، دا حالیت آتے الس ہرانگ کاہے؟