ورنا تے سیرتِ نبویﷺ نا صفت صادق و امین ءِ تینائی کروئی تمک،عطاء اللہ تارڑ

اسلام آباد، بنجائی وزیر حوالکاری و شینکاری عطاء اللہ تارڑ پارینے کہ نبی کریم حضرت محمد مصطفیٰ ﷺ نا سیرتِ طیبہ مچ آ انسانیت کن راہشونی و رحمت نا بن چکل ءِ‘ اینو ننے حضور ﷺ نا تعلیمات و اسوہ حسنہ آ عمل کننگ نا گرج مستین آن بھاز زیات ءِ۔ اسلام آباد اٹی سیرت النبی ﷺ سیمینار آن تران کرسا عطاء اللہ تارڑ پارے کہ قرآنِ مجید اٹی اللہ رب العزت تینا محبوب نبی ﷺ نا شان و مقامِ اقدس ءِ بیان کرینے‘ او پارے کہ نبی کریم ﷺ کائنات نا ودی مننگ نا بنداوی سوب، رحمت للعالمین و خاتم النبیین ءِ‘ و حضور ﷺ ءِ مچ آ انسان و کل جہان تیکن رحمت جوڑ کرسا راہی کننگا۔ بنجائی وزیر پارے کہ قرآنِ مجید ہم نبی کریم ﷺ ءِ عطاء کروک عظیم معجزہ غاتیان اسٹ ءِ‘ ہرا مچ آ انسانیت کن ہدایت نا پدریسہ و ابدی آ وڑءِ‘ عطا تارڑ پارے کہ نبی کریم ﷺ نا شخصیت و تعلیمات آن غیر مسلم آک ہم زہمی مسر و جتا جتا مذہب آتیان تعلقدار تخوک آ قلم کار آک ہم حضور ﷺ نا شان اٹی نوشت و شئیر لکھار۔ او برصغیر نا اسہ سکھ شاعر اسے نا شئیر تا حوالہ ءِ ترسا پارے کہ عشقِ رسول ﷺ مخصوص مذہب یا تپہ غاتسکان کچ اٹ اف‘ او پارے کہ اینو نا دور اٹی راج ءِ مون تروک چیلنج آتتون مون تننگ کن سیرتِ طیبہ غان راہشونی ہلنگ بھاز المی ءِ و ننے نبی کریم ﷺ نا اسوہ حسنہ ءِ تینا عملی زند انا آخبتی بشخ جوڑ کروئی مریک۔ او پارے کہ سیرتِ طیبہ نئے بیرہ جندی بلکہ راجی زند اکن ہم پورو راہشونی فراوان کیک۔ خاص وڑ اٹ ڈیجیٹل دور اٹی ورنا چین ءِ نبی کریم ﷺ نا تعلیمات، کڑدار و اخلاق آن واخب کننگ وخت انا اہم گرج ءِ۔ عطاء اللہ تارڑ پارے کہ جنریشن زی و جنریشن الفا ءِ حضور اکرم ﷺ نا ذاتِ اقدس و تعلیمات آن درستی راستی کننگ المی ءِ۔ ورنا چین سوشل میڈیا تون گنڈوک ءِ‘ ہندا سوب آن دا السی پلیٹ فارم ءِ مثبت، گچینو زمواری مسخت آتیٹی کاریم اٹ اتنگ نا بھاز گرج ءِ۔