فٹبال ورلڈ کپ 2026 اسپین، پرتگال و سوئٹزرلینڈ نا اہم سرسہبی، راؤنڈ آف 16 ٹی گام تخار
لوس اینجلس اسٹیڈیم اٹی مروک میچ اٹی اسپین آسٹریا ءِ 0-3 اٹ کٹا، با تروک آ ٹیم اسُل نزور ئس
Get real time updates directly on you device, subscribe now.
ٹورنٹو / لوس اینجلس / وینکوور (سہیل احمد) فٹبال ورلڈ کپ 2026 نا راؤنڈ آف 32 نا ناک آؤٹ مقابلہ غاک برجا ءُ، ہراڑے تدوک آ دے تیٹی اسپین، پرتگال و سوئٹزرلینڈ تینا تینا میچ آتیٹی سرسہبی آن پد بروک آ ریسہ (راؤنڈ آف 16) کن کوالیفائی کرینو۔ لوس اینجلس اسٹیڈیم اٹی مروک آ میچ اٹی اسپین آسٹریا ءِ 0-3 اٹ شکست ترسا تینا برتری ءِ پک کرے۔ اسپین نا کنڈ آن میکل اویارزابال گچین کارکڑد نا درشانی ءِ کرسا اِرا گول کرے، وخت اس کہ مسٹمیکو گول ءِ پیڈرو کرے۔ دا سرسہبی اٹ اسپین تدوک آ 16 سال اٹی ورلڈ کپ نا ناک آؤٹ ریسہ ٹی تینا اولیکو سرسہبی ءِ دوئی کرے۔ ارٹمیکو میچ اٹی رونالڈو نا تاریخی گول و سنسنی خیز ایسر آن ٹورنٹو ٹی مروک اسہ سخت ءُ مقابلہ اسے ٹی پرتگال کروشیا ءِ 1-2 اٹ کٹا‘ دا میچ اٹی کرسٹیانو رونالڈو پنالٹی کک آ گول کرسا ورلڈ کپ نا ناک آؤٹ ریسہ ٹی تینا کیریئر نا اولیکو گول ءِ کرے و تاریخ ٹہیفے۔ میچ انا فیصلہ کن گول ءِ گونسالو راموس ودکی وخت (stoppage time) اٹی اسہ جوان ءُ ہیڈر اسے نا کمک اٹ کرے۔ کروشیا نا کنڈ آن اسہ گول اس ایوان پیریسچ کرے۔ دا شکست تون اوار عظیم فٹبالر لوکا موڈرچ نا شانی جہانی کیریئر نا ایسر مننگ نا گمان ءِ‘ ہندا وڑ سوئس ٹیم انا تاریخی سرسہبی وینکوور اٹی مروک آ میچ اٹی سوئٹزرلینڈ الجزائر ءِ 0-2 اٹ شکست ترسا 88 سال آن پد ورلڈ کپ نا ناک آؤٹ ریسہ ٹی تینا اولیکو سرسہبی دوئی کرے۔ سوئٹزرلینڈ نا کنڈ آن بریل ایمبولو و ڈین نڈوئے گول کرسا ٹیم انا سرسہبی ءِ پک کریر۔ الجزائر نا ٹیم جوان کارکڑد آن پد ہم سوئس رکھ ءِ پرغنگ اٹی بے سہب مس۔