پاکستان و ترکیہ مدام اسہ ایلو تون اوار سلور. ترک صدر رجب طیب اردوان
قبرص نا باندات آ ترکیہ نا مخ تفی ءِ کینہ، کشمیر آ ترک کلہو آ منت وار اُن
Get real time updates directly on you device, subscribe now.
ترکیہ نا صدر رجب طیب اردوان پارینـے کہ نن مدام اسہ ایلو تون اوار سلور۔ استنبول اٹی وزیراعظم شہباز شریف و ترک صدر رجب طیب اردوان اسیجائی پریس کانفرنس کریر۔ دا وخت آ ترک صدر پارے کہ وزیراعظم شہباز شریف و اونا ڈل ءِ بخیر کینہ، اوڑدہی ٹی تین پہ تینی تعلقداری، ڈیہہ و جہانی باندات آتیا گپ و تران کننگا و ہڑتوم آ ملک آتـا تعلقداری تـا ترندی آ اطمینان نا درشانی ءِ کننگا۔ او پارے کہ جہانی امن کن اسلام آباد مفاہمتی یادداشت بھاز المی ءِ، امن و شونداری کن کوشست آتـا مدام مخ تفی ءِ کینہ۔ تجارت، سرمایہ کاری و زرگزرانی کمک اٹی ودکی نا بابت ہم گپ و تران مس، ہرا نا رِد اٹ خصوصی زرگزرانی زون آتـا بابت تعلقدار آ وزارت آک خڑکی رابطہ غاتـے برجا تخـور۔
پریس کانفرنس اٹی ترک صدر اسرائیل آ امریکہ ایران مفاہمتی یادداشت ءِ بھس کننگ نا دوبہ خلسا اودے پارت کرے کہ اسرائیل ڈیہہ نا رکھ ءِ خطرہ ٹی شاغنگ آن پاناد مرے۔ نیوز بریفنگ آن تران کرسا وزیراعظم شہباز شریف پارے کہ جوان ءُ بخیر و بھلو میزبانی آ صدر رجب طیب اردوان نا منت وار اُن، پاکستان و ترکیہ نا الس نا نیام اٹی است انا گنڈ ارے، جنگ مرے یا قدرتی آفت، ترکیہ مدام پاکستان نا کمک ءِ کرے۔ او پارے کہ سیلاب و زمی جمب آن زہمی آ ہند آتیٹی راجی و زرگزرانی شونداری کن ترکیہ نا کمک نا منت وار اُن۔ وزیراعظم مستی پارے کہ بی ٹو بی فورم اٹی ترکیہ نا کاروباری سرکڑدہ غاتـون اہم ءُ دیوان اس مس، اسیجائی تجارتی کچ ءِ 5 ارب ڈالر اسکان سر کننگ کن پُرعزم اُن۔ او پارے کہ قبرص نا باندات آ ترکیہ نا مخ تفی ءِ کینہ و کشمیر نا باندات آ ترکیہ نا دوٹوک کلہو آ اونا منت واری ءِ ہرفنـہ