دانہ سر اٹی مسافر بس شکست اٹی نہادی انسانی جان تا زیان آ ارمانی اُن،وزیراعلیٰ / گورنر بلوچستان

وزیراعلیٰ بلوچستان میر سرفراز بگٹی خیبرپختونخوا و بلوچستان نا سیمی علاقہ دانہ سراٹی مسافر بس شکست اٹی نہادی انسانی جان تازیان آ است ہسونی نا درشانی ءِ کرینے۔ وزیراعلیٰ میر سرفراز بگٹی پارے کہ شکست نا حوال ملنگ تون حکومت بلوچستان تعلقدار ادارہ غاتے دمدستی وڑاٹ ریسکیو و کمکی کارروائی تے ترند کننگ نا پارت جاری کرے۔ ہڑتوم آ صوبہ غاتا ضلعی انتظامیہ، ایف سی، ریسکیو ادارہ و تعلقدار محکمہ شکست نا جاگہ غا کمکی سرجز آتیٹی لگوک ءُ وخت ا س کہ ٹھپی تے وخت آ و گچین طبی آسراتی تا فراوانی ءِ پک کننگ انگ ءِ۔ اوپارے کہ تعلقدار انتظامی آفیسر آک شکست نا سوب آتا سرجمی اٹ جاچ ءِ ہلنگ ءُ و واقعہ نا پورو جاست وپاست کننگ انگ ءِ۔ وزیراعلیٰ بلوچستان تعلقدار کمامدارآتے پارت کرینے کہ او کمکی کارروائی تیٹی ہچ ءُ کمتی اس اِلیپس، ٹھپی تے ہرممکن طبی آسراتی و زہمی خاہوت آتے ہرممکن کمک فراوان کننگے۔ میر سرفراز بگٹی زوال کروک آ بندغ آتا خاہوت آتون ہڑزخواہی و ہمدردی نا درشانی ءِ کرسا ٹھپی تا زوت دراخ جوڑی کن دعاکرے۔ اوپارے کہ حکومت بلوچستان دا مشکل ساہت اٹی زہمی خاہوت آتون تفوک ءِ۔ داکان بیدس گورنر بلوچستان جعفر خان مندوخیل ژوب ڈویژن نا ضلع شیرانی نا علاقہ دہانہ سر انا خڑک کوئٹہ غان پشاور آ ہنوک آ مسافر کوچ بس انا تمنگ نا سوب پیش بروک آ است ہسون شکست آ ڈکھیائی واست ہسونی نا درشانی ءِ کرینے۔ گورنر مندوخیل ضلعی انتظامیہ، ریسکیو ٹیم و غٹ تعلقدار محکمہ غاتے خصوصی پارت کرے کہ او مسافر تے دمدستی ریسکیو کننگ و ٹھپی تے گچین طبی درمان نا فراوانی ءِ پک کننگ کن غٹ دوئی وسیلہ غاتے متحرک کیر۔ غٹ ٹھپی تے بلاتاخیر دمدستی وڑاٹ آسراتی فراوان کننگ نا وس انا کچ آ کوشست کننگے و داہیت ءِ پک کننگے کہ ریسکیو و ریلیف آپریشن اٹی ڈیوالئی کننگپ۔ گورنر جعفر خان مندوخیل علاقہ نا الس آ ہم زور شاغا کہ او دا سخت انگا وخت اٹی السی کہول آ ہم کمکی ٹیم تا ہر وڑ اٹ کمک ءِ کرسا و ٹھپی تے کن دتر و ایلو ضرورت نا بست وبند کرسا تینا قومی قدر انا پاسداری ءِ کیر۔ مسافر آتا نہادی جان تا زیان و ٹھپی تیا گڑتی نا درشانی ءِ کرسا گورنر پدسلوک آ خاہوت آتون ہمدردی نا درشانی ءِ کرے و ٹھپی تا زوت دراخ جوڑی کن دعاکرے۔