سی ایم سیاسی و میڈیا باندات کمکار،دانہ سراٹی است ہسون بس شکست اٹی 40 مسافر زوال، 8 ٹھپی مسنو

وزیراعلیٰ بلوچستان نا سیاسی و میڈیا باندات کمکار شاہد رند بلوچستان و خیبرپختونخوا نا سیمی علاقہ دانہ سر اٹی پیش بروک آ است ہسون مسافر بس شکست آ ڈکھیائی و است ہسونی نا درشانی ءِ کرسا پارینے کہ بنائی حوال آتا رداٹ شکست اٹی داتم اسکان 40 بندغ زوال وخت اس کہ 8 بندغ ٹھپی مسنو۔ شاہد رند پارے کہ شکست نا حوال ملنگ تون وزیراعلیٰ بلوچستان میر سرفراز بگٹی نا پارت آ اونا اسٹاف آفیسر سید امین بلوچستان و خیبرپختونخوا نا تعلقدار ضلع غاتا ضلعی انتظامیہ تون دمدستی رابطہ کرے، اوکان پد ریسکیو و کمکی کارروائی تا بناءِ کننگا۔ ہڑتوم آ صوبہ غاتا ضلعی انتظامیہ، ریسکیو ادارہ و تعلقدار محکمہ زہمی بندغ آتا کمک و ٹھپی تے دمدستی طبی امداد نا فراوانی ٹی لگوک ءُ اوپارے کہ بنائی معلومداری تا رداٹ کوئٹہ غان پشاور آ ہنوک آ شکست نا گواچی بس اٹی تینا مسافر آتیان بیدس اسہ خراب مروک پین بس اسے نا مسافر آک ہم سُوار ئسر، ہرانا سوب گاڈی ٹی معمول آن زیات بندغ ساڑی ئسر۔ وزیراعلیٰ بلوچستان نا کمکار پارے کہ ضلعی انتظامیہ و تعلقدار آفیسر آک شکست نا سوب آتا سرجمی اٹ جاچ ءِ ہلنگ ءُ، وخت اس کہ زوال کروک آ بندغ آتا درستی راستی ٹھپی تا درمان و زہمی خاہوت آتا وس انا کچ آ کمکاری ءِ پک کننگ انگ ءِ۔ شاہد رند پارے کہ حکومت بلوچستان دا است ہسون سانحہ غا زوال کروک آ بندغ آتا خاہوت آتا غم اٹی بریبرنا شریک ءِ و اوفتے تون ہڑزخواہی و ہمدردی نا درشانی ءِ کیک۔ اوٹھپی تا زوت دراخ جوڑی کن دعاکرساپارینے کہ حکومت زہمی خاہوت آتے وس انا کچ آ کمک فراوان کیک و شکست نا پورو جاست وپاست آن پد راستی تے الس نامون آ اتنگک۔ داکان بیدس حکومت بلوچستان دانہ سر نا ہند آ پیش بروک آ است ہسون مسافر بس شکست نا سوب و راستی تے ہُننگ کن باضابطہ جاست وپاست نا پرمان کرینے۔ وزیراعلیٰ بلوچستان میر سرفراز بگٹی نا پارت آ سیکرٹری ٹرانسپورٹ بلوچستان ءِ واقعہ نا پورو جاست وپاست، غٹ راستی تا جاچ پڑتال و شکست نا سوب آتیا جوا ن ءُ رپورٹ اس جوڑ کرسا پیش کننگ نا پارت جاری کننگانے۔ کمکار وزیراعلیٰ بلوچستان سیاسی ومیڈیا امور شاہد رند پارینے کہ حکومت بلوچستان دا است ہسون شکست نا ہرپلو نا بے کنڈہلوک و شفاف جاچ ءِ ہلیک تانکہ واقعہ نا اصل سوب آتا تعین ءِ کننگ مرے و آخبت اٹ داوڑنا سانحہ غاتا توننگ کن گچین گام گیج کننگے۔ اوپارے کہ وزیراعلیٰ بلوچستان میر سرفراز بگٹی پیدوار پارت کرینے کہ جاست وپاست اٹی ڈیوالئی و بے پرواہی تے سگنگ پننگک و زموار آتا تعین کانود و راستی تے مون آ تخسا کننگک۔ شاہد رند مستی پارے کہ حکومت بلوچستان شکست آن زہمی خاہوت آتا ڈکھیائی ٹی بریبر نا شریک ءِ و اوفتے ہر ممکن کمک فراوان کننگ تون اوار اوار داہیت ءِ ہم پک کننگک کہ جاست وپاست ءِ مون آ تخسا آخبت اٹ الس نا رکھ سفر کن المی اصلاحات و رکھی گام گیج آتیا گچین عملدرآمد کننگے۔