وزیر اعلیٰ بلوچستان و سینئر وزیر سندھ انا ڈٹ بندی کمیشن نا دیوان آن واک آﺅٹ
Get real time updates directly on you device, subscribe now.
کوئٹہ : وزیراعلیٰ بلوچستان جام کمال خان و سندھ انا سینئر وزیر نثار کھوڑو بنجا غان ودکی شونداری فنڈ جتا کننگ نا خواست کریر و پلاننگ کمیشن نا رویہ نابرخلاف برانز کرسا دیوان آن واک آﺅٹ کریر تدوک آدے اسلام آباد اٹ بنجائی سلاہکار خزانہ حفیظ شیخ نا کماشی ٹی سالانہ ڈٹ بندی کمیشن نادیوان اڈ ہلک ہراٹی وزیراعلیٰ بلوچستان جام کمال خان سندھ آن سینئر وزیر نثار کھوڑو تون اوار بشخ ہلک‘ دیوان اٹ وزیراعلیٰ بلوچستان جام کمال خان و سندھ انا سینئر وزیر نثار کھوڑو بنجائی حکومت آن ہڑتوم آ صوبہ غاتیکن ودکی شونداری فنڈ جتا کننگ ناخواست کریر۔ دیوان نا وخت آ وزیراعلیٰ بلوچستان جان کمال خان پلاننگ کمیشن نا رویہ نابرخلاف برانز کرسا اجلاس آن واک آﺅٹ کرے بلکہ بلوچستان نا بنجائی ڈٹ آتے ٹی سست روی و ڈٹ آتے کشنگ آ گڑتی نا درشانی کرے۔ یات سلے کہ وزیراعلیٰ بلوچستان جام کمال، سندھ آن نثار کھوڑو ویڈیو لنک اٹ دیوان اٹ بشخ ہلکوسر۔ وزیراعلیٰ بلوچستان جام کمال خان اسلام آباد نا دورہ ٹی صوبہ نا ویل آتیا بنجائی حکومت تون ہیت وگپ کننگ کن جوڑ بی اے پی نا کمیٹی تون اوار بنجائی وزیر و اوکان پد وزیراعظم تون اوڑدہی کیک۔ وزیراعلیٰ تون چیئرمین سینیٹ محمد صادق سنجرانی، بنجائی وزیر گودی زبیدہ جلال سینیٹر انوارالحق کاکڑ صوبائی وزیرک نور محمد دمڑمٹھاخان قومی اسمبلی نا باسک سردار اسرار ترین و نوابزادہ خالد مگسی اوڑدہی کرے، بنجائی حکومت تون بلوچستان نا برجا بنجائی ڈٹ آتا سست روی پوسکن آ ڈٹ، ڈیم تا تفنگ بجلی و گیس انا ویل آتون اوار ایلو تعلقدار باندات آتیا سوگو ءُ موقف اس دوئی کننگ آ امنا کننگا۔ اوڑدہی ٹی بنجائی وزیر پلاننگ اسدعمر بنجائی وزیر توانائی عمر ایوب و سلاہکار خزانہ حفیظ تون اوڑدہی نا ایجنڈا پک مس۔ بلوچستان عوامی پارٹی نا سینیٹر و قومی اسمبلی نا باسک آک صوبہ نا موقف ءِ بنجائی کہول آ پبی وڑاٹ پیش کیک۔
(آن لائن /اے پی پی)