زرگزرانی سوگوی وآخبت ڈٹ بندی ءِ تینا اولیت آتا بشخ جوڑکروئی مریک،احسن اقبال

اسلام آباد، بنجائی وزیر ڈٹ بندی، شونداری و خصوصی گام گیج احسن اقبال پارینے کہ ترندی اٹ بدل مروک آ جہانی حالیت، مون آ بروک ٹیکنالوجی، موسمیاتی بدلی، جغرافیائی سیاسی بے چیٹی و زرگزرانی بے باور حالیت آتا رداٹ مدامگی شونداری پالیسی تا ریسہ‘ ادارہ ئی کچ اٹی ودکی و مریس مدی حکمت عملی المی مسنے، بدل مروک آ جہانی حالیت آتتون مون تننگ کن ملک آتے پیشگی تیاری، زرگزرانی سوگوی، و آخبت ڈٹ بندی ءِ تینا اولیت آتا بشخ جوڑکروئی مریک۔ داخیال آتا درشانی ءِ او دوشنبے نادے داڑے علامہ اقبال اوپن یونیورسٹی ٹی سسٹین ایبل ڈویلپمنٹ پالیسی انسٹی ٹیوٹ (ایس ڈی پی آئی) نا کنڈآن اڈ ہلوک 29 می مدامگی شونداری کانفرنس و چارمیکو مدامگی زرکاری نمائش آن خاص انگا مہمان نا وڑ اٹ تران کرساکرے۔ بنجائی وزیرپارے کہ ترندی اٹ شونداری کروک ٹیکنالوجی و موسمیاتی بدلی نا ودوک آ زہمک مچ آ دنیا نا زرگزران و راج آتے بنداوی وڑاٹ زہمی کننگ ءُ ہرانا سوب ملک آتے روایتی طرز فکر اٹ مونی ہنسا فعال، مربوط و آخبت آ تالان حکمت عملی اس تینائی کروئی مریک۔ اوپارے کہ بدلی اسہ پک راستکی اسے و قوم تتون اِرا کسر ءُ، یاتو او بدلی آن خلسا اونا منفی اثر زہم تتون مون ایتر یا وخت آ و گچین حکمت عملی اس تینائی کرسا دا چیلنج آتے شونداری نا پوسکن آ وارخواہی تیٹی بدل کیر۔ پاکستان نا تکنیکی شونداری نا ارادگی نا درشانی ءِ کرسا اوپارے کہ حکومت (آرٹیفیشل انٹیلی جنس) سائبر سیکورٹی، بگ ڈیٹا و کلاؤڈ کمپیوٹنگ نا قومی ہند جوڑ کرینے تانکہ ورناتے پوسکن ٹیکنالوجی نا خواست آتتون ہم گرنچ کننگ مرے و اوفتے آخبت نا جہانی زرگزران تیٹی گچین کڑد ادا کننگ نا قابل جوڑ کننگ مرے۔