دہشتگردی نا چٹفنگ کن مخصوص بندغ آتا ٹیرر کرائم اواری ءِ پرغنگ المی ءِ،کور کمانڈرز کانفرنس

راولپنڈی، فیلڈ مارشل سید عاصم منیر پارینے کہ قوم انا مخ تفی اٹ سلہہ بند فوج پاکستان ناوتواجہی‘علاقائی سالمیت،قومی سلامتی نارکھ اکن پورو وڑاٹ سنبرینگوک ءِ‘ فیلڈ مارشل سید عاصم منیر ناکماشی ٹی کور کمانڈر کانفرنس اڈہلک‘ کانفرنس نا شریدار آک شہید آتا بے مٹ قربانی تے خراج عقیدت پیش کریر۔ فیلڈ مارشل عاصم منیر پارے کہ انٹیلی جنس بیسڈ آپریشن تے پین سوگو کننگ نا عمل ءِ برجا تخنگے‘ فارمیشنز پوسکنوڑ ٹیکنالوجی نادوئی کننگ‘ کل جنگی چاہنداری تا اواری اٹ دفاعی لائخی تے ٹی ودکی ءِ برجا تخنگے‘ فورم سلہہ بند فوج‘ کانود نافذ کروک ادارہ و مادر وطن کن جان تے ندر کروک آتیکن دعا پاتیہ کرے۔ شریدار آک پاریر کہ ہروڑ اناسوب آ بیداد آتالان خارتس یا 9 مئی کون آ حالیت ودی کننگ نا ہر کوشست تون مون تننگک۔ دا حالیت آتے ٹی فیصلہ ئی طاقت و کانودنا رد اٹ بے فرق کارروائی کننگک‘ بھارت نا کاریمی ناوڑ اٹ دہشتگردی نا بھلا نتیجہ نا زموار بیرہ سرکڑدہ غاک ءُ۔ آئی ایس پی آر نا رد اٹ شریدار آک دہشتگردی نا چٹفنگ کن ڈغاری کارروائی تتون اوار جوان انتظامی و گورننس نا گام گیج آتے المی گوندسا کانود نافز کروک ادارہ غاتا سرسہب انٹیلی جنس بیسڈ دہشتگردی تور کارروائی تا ستاءِ کریر۔ شریدار آک پاریر کہ اوغانستان آن مروک دہشتگردی نا برخلاف ٹارگٹڈ کارروائیک پاکستان نا دفاعی حق ءُ‘ المی ءِ کہ الس نا اواری اٹ دہشتگردی نا سوب آتیا جوان رابطہ و بیانیہ غا کاریم کننگے‘ دہشتگردی نا چٹفنگ کن مخصوص بندغ آتا ٹیرر کرائم اواری ءِ پرغنگ المی ءِ۔ کور کمانڈرز کانفرنس پولیس نا کاریمی واکداری کچ ءِ ودفنگ آزور شاغسا پارے کہ پاکستان کن تہہ آن سوگو مننگ بھاز المی ءِ۔ آئی ایس پی آر نارد اٹ فورم پاکستان، سعودی عرب، ترکیہ نا نیام اٹ مکہ اسیجائی دفاعی معاہدہ نا ستاءِ کرے۔ فورم معاہدہ ءِ متکن آ اسٹریٹجک تعلقداری، اسیجائی دفاعی کمکاری نا شون تننگ اٹ اہم گوندا۔ کورکمانڈرز کانفرنس نا شریدار آک سعودی عرب نا برخلاف حوثی جہو تا سخت انگا لوز آتے ٹی مذمت ءِ کرسا ترندی نا درشانی ءِ کرے‘ شریدار آک سعودی عرب تون یکجہتی نا درشانی، حرمین شریفین نا رکھ‘ تقدس کیلئے پاکستان ناارادگی نا دوارگی ءِ کرے۔ فورم نارد اٹ مسئلہ کشمیر ءِ اقوام متحدہ سلامتی کونسل نا قرارداد،کشمیری الس نا استخواہی تا وڑ اٹ ایسر کننگے۔