ورناک ملک وقوم انا اصل میرات ءُ‘ آب اٹو تعلیم و روزگار ناوارخواہی تننگے،گورنر بلوچستان

کوئٹہ، گورنر بلوچستان جعفر خان مندوخیل پارینے کہ جمہوریت بیرہ گچین کاری عمل نا پن اف بلکہ الس نا سرکڑدہ‘ اجتماعی زمواری و کل ءِ اوار کرسا کاریم کننگ نا سیاسی نظام اسے‘ نن حکومت ءِ ہر کہول آ سوگو کننگ کن گام گیج کننگ اٹی اُن۔ دا وخت آ ورناتے تینے آن خڑک اتنگ و اوفتے قومی دنگ اٹ اوار اوار کننگ بھاز المی ءِ‘ ورناک ملک و قوم انا اصل میرات ءُ، ہندا سوب آن المی ءِ کہ اوفتے آب اٹو تعلیم و روزگار نا وارخواہی فراوان کننگے و پوسکنور خواست آتتون ہمگرنچ ڈیجیٹل چاہنداری تننگے۔ دا خیال آتا درشانی ءِ او گورنر ہاؤس کوئٹہ ٹی صوبائی وزیر میر عاصم کرد گیلو، نور محمد دومڑ، صوبائی اسمبلی نا باسک زرک خان مندوخیل و پارلیمانی سیکرٹری محمد خان لہڑی تون اوڑدہی نا وخت آ گپ وتران کرسا کرے۔د اوخت آ گورنر بلوچستان پارے کہ جمہوری ادارہ غاتا بنداوی زمواری دادے کہ او تینا زمواری تا خیال ءِ کیر‘ راجی انصاف ءِ سوگو کیر و شاری تا آئینی حق و واکداری تا رکھ ءِ پک کیر۔ پوسکن گچین مروک السی نمائندہ غاتیا سیاسی و راجی اعتبار اٹ اہم زمواری مریک‘ اوفتے راج اٹی بشخ وبانٹ و مُری ودی کننگ نا جاگہ غا قومی سیوت و تین پہ تینی شرف انا شون تننگ کن عملی و شعوری کوشست کروئی تمک۔ السی نمائندہ غاک تینا گچین کاری حلقہ غاتیٹی خاص وڑ اٹ ہمو چُپ گیشتری نا توار ءِ خف تورر ہرا تینا حق آتا دوئی کننگ و ویل آتا ایسری کن تینٹ توار چست کننگ کپک۔ او پارے کہ ساڑی حکومت نا کنڈ آن ہرفوک زرگزرانی پالیسی و گام گیج آتا سوب آن ملک زرگزرانی مشکل آتیان پیش تمنگ نا کنڈ آ پیشرفت کننگ اٹی ءِ‘ داسہ گرج دا ہیت اناءِ کہ زرگزرانی سوگوی ءِ السی شونہالی ٹی بدل کننگ کن کاروباری، واپاری‘ و زرگزرانی سرجز آتے پین ودفنگے و لس شاری تیکن روزگار و زرگزرانی وارخواہی تا ودی کننگ نا کسر ءِ آوار کننگے۔ گورنر جعفر خان مندوخیل پارے کہ جمہوری نظام نا سوگوی نا زمواری بیرہ حکومتی ادارہ غاتیا اف بلکہ السی نمائندہ غاتا عمل کننگ نا وڑوڈول‘سیاسی سگ‘ شفافیت و الس تون پدریسہ رابطہ ٹی ہم ارے‘ گچین مروک نمائندہ غاک اگہ تینا حلقہ غاتا ویل آتے اولیت تننگ و اجتماعی ہدف و فائدہ غاتے مون آ تخر تو داڑان بیرہ جمہوری ادارہ غاک سوگو مریرہ بلکہ الس نا نظامِ حکومت آ پت ہم پین سوگو مریک۔ گورنر مندوخیل پارے کہ وخت انا خواست دادے کہ سیاسی تعلقداری تیان ایڑتر مرسا السی آسودہی‘ آئین نا بالادستی، کانود نا حکمرانی و راجی ہم آہنگی کن کڑد ادا کننگے۔