ضلعی انتظامیہ امن و ایمنی نا پک کننگ کن وس انا کچ آ گام گیج کننگ ءِ،ڈپٹی کمشنر نصیر آباد وریند رلعل

ڈپٹی کمشنر نصیر آباد وریند رلعل نا کماشی ٹی ضلعی امن کمیٹی نا اسہ اہم ءُ دیوان اس مس ہراٹی ایس ایس پی نصیر آباد، ڈی ایس پی نصیر آباد اسسٹنٹ کمشنر نصیر آباد، منظور شیرازی آن بیدس جتا جتا فکری تپہ نا نمائندہ، عالم دین، قبائلی سرکڑدہ و تعلقدار محکمہ غاتا افسر آک بشخ ہلکر۔ دیوان اٹی شاری تے مون تروک ویل، امن وایمنی نا جم حالیت و تین پہ تینی ہم گرنچی نا مونی دننگ نا بابت سرجمی اٹ گپ وتران کننگا۔ دیوان اٹی ہیت وگپ کرسا عالم دینک 10 محرم الحرام نا وخت آ گچین بست وبند کننگ آ ڈپٹی کمشنر و پولیس فورس انا منت واری ءِ ہرفیر و اوفتا کوشست آتا ستاءِ کریر۔ داوخت آ ڈپٹی کمشنر وریندر لعل پارے کہ ہر ضلع یا علاقہ نا شونداری شونہالی وسوگوی نا دارومدار مدامگی امن و ایمنی آ مریک اگہ راج اٹی امن مرے تو نئے بیرہ الس ءِ سکون دوئی مریک بلکن شونداری سرجزآتے ہم مونی دننگ ملک۔ اوداعزم انا درشانی ءِ کرے کہ ضلعی انتظامیہ امن و ایمنی ءِ پک کننگ کن ہر وڑ انا گام گیج کننگ ءِ و کل دوئی وسیلہ غاتے کاریم اٹ اتنگک۔ ڈپٹی کمشنر مستی پارے کہ امن اٹی کانود نافذ کروک ادارہ غاتون اوار اوار الس، راجی راہشون و عالم دین تا کڑد بھاز اہم ءِ دارداٹ تین پہ تینی کمکاری سگ و ایلمی نا چاگڑد ءِ مونی دننگ وخت انا اہم گرج ءِ اوبشخ ہلوک آتیا زور شاغا کہ او ہوکاتیان پاناد کیر و شکبر سرجز اسے نا دمدستی حوال ءِ تعلقدار ادارہ غاتے ایتر تانکہ وخت آ کارروائی کننگ مرے۔ دیوان اٹی داہیت آ ہم امنا کننگاکہ مچ آ ضلع ٹی امن و ایمنی نا چاگڑد ءِ برجا تخنگ کن اسیجائی کوشست آتے برجاتخنگک و السی ویل آتا ایسری کن گچین سج پام اس تینائی کننگک۔