ڈٹ آتا پوروی ءِ پک کروک مد انا تہٹی امر کہ مرے پک کننگے،فریدہ ترین

ڈپٹی کمشنر صحبت پور فریدہ ترین سب ڈویژنل آفیسر (بلڈنگز) تون اوار پوسکن تفوک ریسکیو 1122 سینٹر صحبت پور نا دورہ ءِ کرے، ہراڑے او برجا تفوئی سرجز، کاریم نا آب و ترندی نا جاچ ءِ ہلک، دورہ ٹی تعلقدار کمامدارآک ڈپٹی کمشنر ءِ ڈٹ انا جم پیش رفت پوروی نا چندی ریسہ مون تروک باندات و آخبت نا سج پام آن معلومدار کریر۔ ڈپٹی کمشنر جاگہ غا ساڑی آفیسر آتتون ہیت وگپ کرسا داہیت آ زور شاغا کہ تفوئی کاریم تے نئے بیرہ ترندیاٹ برجاتخنگے بلکن داٹی بڑزکو آب ءِ ہم امر کہ مرے پک کننگے۔ فریدہ ترین پیدوار پارت کرے کہ ڈٹ انا پوروی ءِ تخوک آ مد اٹ امر کہ مرے پک کننگے تانکہ ضلع نا الس ءِ زوت آن زوت پوسکن و آب اٹ ہلہلہ ئی کمکی آسراتی فراوان کننگ مرے۔ اوداہیت آ ہم زور شاغا کہ تفوئی کاریم نا آب آ ہچ ءُ سمجھوتہ اس کننگپک۔ و دا رداٹ تعلقدار افسر آک تینا زمواری ءِ پورو ایمانداری و کسبی چاہنداری اٹ سر ایتر۔ اومستی پارے کہ ریسکیو 1122 سینٹر نا جوڑ کننگ ضلع صحبت پور کن بھاز اہمیت والو ڈٹ اسے، ہرا ہلہلہ ئی حالیت آتیٹی الس ءِ وخت آ، گچین و سوگو کمکی خذمت آتا فراوانی ٹی اہم کڑد ادا کیک۔ دا سینٹر نا فعال مننگ آن نئے بیرہ شکست، خاخر لگنگ نا واقعہ و ایلو ایمرجنسی حالیت آتیٹی دمدستی رسپانس پک مریک بلکن شاری تا پت ہم حکومتی ادارہ غاتیا پین سوگو مریک۔ ڈپٹی کمشنر داعزم انا درشانی ءِ کرے کہ ضلعی انتظامیہ السی راجی آسودہی نا ڈٹ آتا وخت آ پوروی و آب اٹ عملدرآمد ءِ پک کننگ کن کل وسیلہ غاتے کاریم اٹ اتنگ ءِ تانکہ الس ءِ گچین آسراتی تا فراوانی پک مننگ کے۔