ساسولی قومی اتحاد نوشکے نا کنڈ آن ساسولی ٹاؤن اٹی سلابتی جرگہ

ساسولی قومی اتحاد نوشکے نا کنڈآن ساسولی ٹاؤن اٹی اسہ اہم ءُ سلابتی جرگہ اس اڈ ہلک، ہراٹی ساسولی قبیلہ نا شرفمند، سرکڑدہ، ورنا چین و راجی شخصیت آک بھلو کچ اسے ٹی بشخ ہلکر۔ جرگہ غان ساسولی قومی اتحاد نا متحرک راہشون حافظ محمد قاسم ساسولی، صلاح الدین ساسولی و مولوی میر خان ساسولی تران کرسا پاریر کہ دا سلابتی دیوان نا بنداوی مسخت تنظیم نا پوسکن آ ضلعی کابینہ نا ٹہیفنگ، ورنا تے منظم کننگ و اوفتے شون و جہد انا جوان آ کسر آ مون آ دننگ ءِ تانکہ قبیلہ ءِ پیش بروک ویل آتا ایسری کن بھرمی و منظم ءُ وڑ اسے ٹی جہد کننگ مرے۔ ترانکار آک پاریر کہ ساسولی قبیلہ مدام اسہ پرامن، کانود پسند و محبِ وطن ءُ قبیلہ اس مسنے۔ بدبختی اٹ السی نمائندہ غاتے پدریسہ گچین کاری تیٹی پورو مخ تفی تننگ آن پد ہم، سرسہبی آن پد ساسولی ٹاؤن ءِ شونداری ڈٹ آتیٹی مدام گوجالنگانے۔ کیہی وار اخبار و سوشل میڈیا نا کمک اٹ دا بیدادی نا نشاندہی کننگا، ولے اینو اسکان علاقہ نا بنداوی ویل آتے ایسر کننگ تنے۔ جرگہ نا شریدار آک ڈی سی نوشکے آن خواست کریر کہ او راستکی تا تینٹ جاچ ءِ ہلنگ کن ساسولی ٹاؤن نا دورہ ءِ کے و بی ایس ڈی آئی پروگرام نا رِد اٹ کروک خواست آتے اولیت نا بنداو آ منظور کرسا ساسولی ٹاؤن کن شونداری ڈٹ آتا دمدستی منظوری ءِ پک کے۔ (نمائندہ تلار)