سویلی پنجاب نا صوبہ نا عملی دروشم تننگ نا بنا مسنے، شاہ محمود قریشی

اسلام آباد (اے پی پی) وزیر خارجہ شاہ محمود قریشی پارے کہ سویلی پنجاب نا صوبہ ننا منشور اٹی ئس اینو اونا عملی دروشم تننگ نا بنامسنے۔ پنچ شنبے نادے آ سویلی پنجاب نا بابت ویڈیو بیان اٹی وزیر خارجہ پارے کہ ای سویلی پنجاب نا اسہ گچین مروک ءُ نمائندہ اسے نا حیثیت اٹ وزیراعظم پاکستان و چیئرمین پاکستان تحریک انصاف عمران خان نا است انا ہُب اٹ منت واراُٹ۔ ایڈیشنل چیف سیکرٹری سویلی پنجاب و ایڈیشنل آئی جی سویلی پنجاب نا تعیناتی مسنے۔ اوپارے کہ کنا ہڑتوم آ آفیسر آتون ہیت مس او تینا چارج ءِ سنبھالنگ کن تیار ءُ وزیراعظم عمران خان و وزیراعلیٰ پنجاب عثمان بزدار اوفتے پوروڑاٹ بریف کرینو کہ ننا اوفتیان اومیت آک انت ءُ۔ سویلی پنجاب نا مخلوق ءِ داسہ تینا کاریم تا بابت لاہور آ ہِننگ نا گرج مفک، اوفتا پولیس تون تعلقدار باندات و انتظامی باندات آک ملتان و بہاولپور اٹ ایسر مریرہ۔ ہڑتوم آ آفیسر آک بہاولپور و ملتان ہڑتوم آ جاگہ غاتیان تینا دفتر جوڑ کیرہ و ہموڑے مرسا الس نا ویل آتے ایسر کیرہ، دا واکداری تا شیفکو کہول آ گدریفنگ نا بابت ہم بے کچ اہم ءُ گام اسے۔ وزیر خارجہ پارے کہ نیشنل فنانس ایوارڈ آنبار پرونشل فنانس ایوارڈ ہم بھاز المی ءِ۔ کابینہ نا فیصلہ نا رداٹ ہراتم پرونشل فنانس ایوارڈ نافذ مریک تو ضلع غاتے اوفتا آبادی، اوفتاگرج و اوفتا محرومی تے مون آ تخسا فنڈ دستیاب مریک۔ دامستین آنبار سویلی پنجاب نا فنڈ آتے پین مد اسے ٹی بدل کرسا خڑچ کننگ مفک۔ داسہ سویلی پنجاب نا پیسہ غاک سویلی پنجاب آ خڑچ مریرہ۔ دابھاز بھلو گام اسے ہرانا نن ستاءِ کینہ۔ اوپارے کہ داسہ سویلی پنجاب نا مخلوق ءِ اوفتا اُراتا خڑک آ انصاف ملک۔