نواز شریف نا مچ زند نابودی نا چٹفنگ کن سپریم کرٹ اٹ اپیل نا فیصلہ

اسلام آباد : قائد ن لیگ نوازشریف نا مچ زند نابودی ءِ چٹفنگ کن حکمران جماعت پوسکن آ کانود نارد اٹ اولسر اپیل سپریم کورٹ اٹ دائر کننگ نافیصلہ کرینے‘ دا اپیل آئین نا آرٹیکل 62 ون ایف نا رد اٹ مچ زند نابودی نا بارو اٹ فیصلہ نابرخلاف دائر کننگک وخت اس کہ نوازشریف بنداوی گڑاتا نہاد آتے ٹی پین کمتی نا پرمان ہم کرینے۔ ن لیگ نا حوالی نا رد اٹ نواز شریف نا مچ زند نابودی نا چٹفنگ کن مسلم لیگ ن نا سینئر سرکڑدہ غاک سلاہ کرینو‘ حوالی نا رد اٹ اہم انگا دیوان ناکماشی ءِ ویڈیو لنک آ قائد ن لیگ نوازشریف کرے‘ دیوان اٹ وزیراعظم شہباز شریف، بنجائی وزیر اسحاق ڈار، رانا ثناء اللہ، مریم نواز، خواجہ آصف، احسن اقبال، مریم اورنگزیب، وزیر کانود اعظم نذیر تارڑ، ملک احمد خاں و اٹارنی جنرل ساڑی ئس۔ مسلم لیگ ن نا دیوان اٹ سپریم کورٹ نا فیصلہ غاتیا اولسر جاچ نا بابت جوڑ مروک پوسکن آ کانود آن پد انا حالیت آتیا سجفنگا و نوازشریف نا مچ زند نابودی ءِ چٹفنگ کن بھلو فیصلہ کننگا۔حوالی نا رد اٹ مسلم لیگ ن نا سینئر راہشونک دا ہیت آامنا کرینو کن پاناما کیس اٹ اولسر اپیل نا جاگہ غا 62 ون ایف نا بابت سپریم کورٹ نا فیصلہ نابرخلاف اولسر اپیل دائر کننگک۔ حوالی نا رد اٹ ن لیگ 62 ون ایف نا رد اٹ چیف جسٹس عمر عطا بندیال نا فیصلہ نابرخلاف اولسراپیل دائر کیک‘ دا بابت ن لیگ مچ زند نابودی ءِ اسہ وار اکن پنچ سال نا نابودی ٹی بدل کننگ نا خواست کیک‘ دا فائدہ ءِ پوسکن آ کانود نا رد اٹ ہرفنگک۔ اپیل آ حق اٹ فیصلہ بننگ آن پد نواز شریف و جہانگیر ترین ہڑتوم آتا مچ زند نابودی چٹک‘ پنچ سال انا نابودی نا رد اٹ او دا وخت ءِ مہالو آن پورو کرینو۔ حوالی نا رد اٹ وزیرکانود و اٹارنی جنرل ءِ زوت اولسر اپیل سپریم کورٹ اٹ دائر کننگ نا پارت کننگانے۔ مسلم لیگ ن نا سینئر راہشون تا دیوان اٹ ملک انا زرگزرانی‘ سیاسی و امن وایمنی نا حالیت آتیا سجفنگا و نوازشریف پدتموک غریب تپہ ءِ ہر وڑ اٹ ریلیف تننگ نا پرمان کرے۔ سانحہ 9 مئی نا زموار تے ہر حال اٹ اوفتا کروک آتا سزا ترفنگ نا عزم کننگا۔

(آن لائن)