کوئٹہ، اَرے زئیفہ و 2 چنا تا دون اسے ٹی تمنگ آن زوال
کوئٹہ نا کیبی علاقہ کلی باریزئی ٹی ہنکینی بندغ اُرا نا دُون اٹی جنریٹر چلیفسا کاریم کریکہ، دُون انا آکسیجن چٹا
کوئٹہ : کوئٹہ نا علاقہ کلی باریز ئی ٹی اُراسے ٹی دون اٹ سَفائی نا وخت آ دم کشتہ مننگ آن اسہ خاہوت نا اَرے زئیفہ و مارتتون اوار چار بندغ زوال مسر۔ پی ڈی ایم اے،پولیس و انتظامیہ لاش تے کشسا اوفتا خاہوت آتے تس۔ حوال نا رد اٹ جمعہ نا دے کوئٹہ نا کیبی علاقہ کلی باریزئی ٹی ہنکینی اسہ بندغ محمد علی مری اُراٹی دیر انا دون اٹ جنریٹر چلیفسا کاریم کریکہ‘ دون اٹ آکسیجن نا چٹنگ نا سوب آن او تسینگا‘ باوہ ءِ بچفنگ کن اونا مار دون اٹ دڑنگا اوکان پد پد ریسہ مار انا لمہ وایلو مار ہم دون اٹ دڑنگا۔ واقعہ نا ڈہ رسینگ آ ایس ایچ او شالکوٹ عابد مینگل، ڈی ایس پی شالکوٹ سرکل خلیل احمد بگٹی، ایس پی سریاب ڈیژن ضیاء مندوخیل و اسسٹنٹ کمشنر سریاب نثار احمد لانگو جاگہ غا سر مسر۔ پی ڈی ایم اے نا ریسکیو ٹیم ءِ بٹنگ انگا ہراڑے مستونگ آن تعلقدار ورنا جلیل احمد شاہوانی و امیر حمزہ شاہوانی جیرت نشان ترسا دون آن محمد علی مری اونا زئیفہ و 2 مار خمیسہ خان و محمد یوسف نا لاش ءِ دون آن کشسا ہسپتال آ سر کریر‘ ہراڑے المی کارروائی آن گڈ لاش تے اوفتا وارث آتے تننگا۔یات سلے کہ داکان مست ہم سریاب نا علاقہ گہری کاریز اٹ تموک ورناتے مستونگ آن تعلقدار ہندا اِرا ورنا بہادری اٹ کوشست کرسا لاش تے کشاسر۔ اسہ وار ولدا ہندا ورناک تینا جان تے دلدست آ تخسا اسہ خاہوت نا 4بندغ نالاش تے کشسا انتظامیہ ءِ تسر۔
(آن لائن)