پاکستان کن زرگزرانی تنکی کورونا غان زیات گڑتی نا سوب ءِ، اسد عمر

اسلام آباد(آن لائن) بنجائی وزیر ڈٹ بندی اسدعمر پارینے کہ پاکستان کن زرگزرانی تنکی کورونا غان زیات گڑتی نا سوب ءِ، او پارے کہ کورونا وبا نا سوب آن خلوک آ ساڑی رکھ آک 9 مئی اسکان نافذ مریرہ، پاکستان اٹی اسہ کروڑ 80 لکھ بندغ بے روزگار و 10 لکھ چنکو ادارہ بند مننگ نا گڑتی نا باٹی ءُ، ہر چار آن اسہ پاکستانی اُرا سے ٹی کن خور نا کمتی ءِ۔تدوک آ منہ دے ٹی کورونا وائرس آن زوال آتا کچ اٹی ودکی مسنے ہرا جوان ءُ ہیت اس اف، پاکستان اٹی کورونا غان زیات بندغ ٹریفک شکست آتیٹی کہیرہ، داہیت آتا درشانی ءِ او میڈیا ءِ بریفنگ ترسا کرے۔ اسد عمر پارے کہ کورونا دین انا سوب آن خلوک آ رکھ آک 9 مئی اسکان برجا سلرہ۔ 9 مئی آن مست وزیراعظم عمران خان نا کماشی ٹی دیوان اس مریک، ہراٹی اہم ءُ فیصلہ کننگک۔ قومی رابطہ کمیٹی 9 مئی آن پد نا حکمت عملی نا بابت فیصلہ اس کیک۔ اسد عمر پارے کہ مون نا منہ دے اٹی کورونا وائرس آن مرک آتیٹی ودکی مسنے۔ ہرا جوان ءُ ہیت اس اف۔ زوال آتا خیسن آ چشخ آن جپانن، و ہڑدے 24 مرک مننگ اٹی ءُ، ولے آبادی نا تناسب اٹ پاکستان اٹی دا کچ کم ءِ۔ بنائی دے تیٹی غٹ آن زیات اسپین اٹی زوال آک مسر۔ و پاکستان اٹی 10 لکھ شاری آن بیرہ 2 بندغ زوال مسر۔ دا اللہ نا کرم ءِ۔ پاکستان اٹی ناجوڑی داخس کسفنگ نا سوب جوڑ مفننگ ءِ، ہراخس کہ یورپ اٹ مس۔ پاکستان نا مون اٹ امریکہ ٹی 58 ہموخس و برطانیہ ٹی 124 ہموخس زیات زوال مسر۔ بنجائی وزیر پارے کہ کورونا غان زیات تو ٹریفک شکست آتیٹی بندغ آک کہیرہ۔ ولے ولدا ہم نن ٹریفک نا موکل ایتنہ۔ اگہ دا ہیت ءِ است اٹ شان کہ کورونا غان مرک ءِ صفر کروئی ءِ، تو داڑکن ہندن ءُ گام گیج کروئی تمک ہرافک انسان کن زیات کسفنگ نا سوب مفک، دن مف کہ کورونا غان زیات پین گڑاس کسفنگ نا سوب جوڑ مرے۔ پاکستان اٹی اسہ تُو اٹی کم و وَد چار 4 ہزار 800 آن زیات بندغ ٹریفک شکست آتیٹی کہیرہ۔ ولے نن ٹریفک ءِ ولدا ہم موکل ایتنہ و گاڈی سڑک آ چلینگک۔ انتئے کہ ٹریفک آ رکھ زیات نسخان نا سوب ءِ۔ اسد عمر پارے کہ دا ناجوڑی دنیا ٹی ہراخس کہ کسفنگ نا سوب جوڑ مس، اوخس ننا کر آ اف۔ ولے زرگزرانی نسخان زیات ءِ۔ لاک ڈاﺅن آن زرگزرانی وڑ اٹ حکومت ءِ کٹیا ٹی 119 ارب روپئی نا نسخان مس۔ روزگار اٹی بھلو کچ اسے ٹی کمتی بسنے۔ پاکستان اٹی اسہ کروڑ 80 لکھ بندغ بے روزگار مننگ نا گمان ءِ۔ 10 لکھ چنکا ادارہ بند مننگ نا خڑک آٹو۔ ہر چار آن اسہ پاکستانی اُرا سے ٹی کن خور نا کمتی مسنے۔ اسد عمر پارے کہ کورونا ءِ پورو چٹفنگ مفک۔ دانا تالانی ءِ شیف شاغنگ مریک۔ یورپ تون اوار مچ آ دنیا ٹی بہت آ ملک آک کرار کرار آ روزگار نا ریڑا ءِ چلیفنگ کن رکھ آتے کم کننگ اٹی ءُ۔ مدامی کن ملک ءِ بند کروک تولوک مننگ کپنہ۔ ننا ہدف جانجوڑی نا نظام ءِ گچین کننگ ءِ۔ ننا جانجوڑی نا نظام مون نا اِرا تُو ان امون اٹ داسہ گچین ءِ۔ کرار کرار آ رکھ آتے کم کینہ۔ روزگار نا وارخواہی تے ودفنہ۔ بروک آ منہ دے اٹی بنجائی حکومت غٹ صوبہ غاتتون سلابت کرسا پین جونا ءُ فیصلہ کیک۔