پاکستان ایران و امریکہ نا نیام اٹ خیرخواہ نا وڑاٹ کڑد ادا کننگ اٹی ءِ،سجاد حیدر

اسلام آباد، دفترِ خارجہ پارینے کہ پاکستان ایران و امریکہ نا نیام اٹی رابطہ و مذاکرات کن تینا کڑد ءِ ادا کننگ اٹی ءِ و ہڑتوم آ فریق آتیا زور شاغسا بسنے کہ پدسلوک باندات آتے مذاکرات و سفارت کاری نا کمک اٹ ایسر کننگے‘ بھارت اٹی بابری مسجد نا شہادت نا پاننگوک کوشست و صومالیہ نا خڑک پاکستانی بحری جہاز آ جلہو مذمت نا قابل ءِ‘ ترجمان دفترِ خارجہ سجاد حیدر ہفتہ وار پریس بریفنگ آن تران کرسا پارے کہ پاکستان جھیڑہ غاتا پرامن ایسری و علاقائی امن و سوگوی کن سفارتی کوشست آتے برجا تخک‘ ترجمان پارے کہ وزیراعظم محمد شہباز شریف اقوامِ متحدہ نا جنرل اسمبلی نا 81 می دیوان اٹ بشخ ہلنگ کن نیویارک نا دورہ ءِ کرے، ہراڑے او اہم تین پہ تینی و کثیر الجہتی اوڑدہی کرے۔ نائب وزیراعظم و وزیر خارجہ اسحاق ڈار ہم 21 آن 25 ستمبر اسکان نیویارک اٹی بڑزکو کہولی کیہی اوڑدہی تے بشخ ہلک‘ او پارے کہ اسحاق ڈار وزیراعظم نا نیویارک دورہ و دا نیام اٹی مروک اہم سرجز آتا بابت بریفنگ ایتک‘ دفترِ خارجہ نا رِد اٹ پاکستان نا کنڈ آن شنگھائی کمکار تنظیم نا ساڑی سرکڑدہی نا رد اٹ قومی رابطہ کار تا اولیکو دیوان 28 آن 30 ستمبر اسکان اسلام آباد اٹی اڈ ہلک‘ دیوان اٹی باسک ملک آتا قومی رابطہ کار آک تنظیم نا سرجز، اہم گام گیج و بروک آ دیوان تا تیاری تا جاچ ءِ ہلکر‘ پاکستان باہمی رابطہ کاری، عملی کمکاری، پوسکنوڑی و اسیجائی شونداری نا شون تننگ ءِ تینا اولیت آتیٹی اوار گوندا‘ ترجمان پارے کہ ایس سی او نا کل باسک ملک آتا قومی رابطہ کار دیوان اٹی بشخ ہلکر‘ ہرافتے ٹی بھارت ہم اوار ئس‘ او پارے کہ اِرا سال آن زیات وخت آن پد بھارت آن اسہ سینئر کمامدار اسے نا پاکستان نا دورہ مس‘ بھارتی قومی رابطہ کار سیالکوٹ، فیصل آباد و لاہور نا دورہ غاتیٹی استخواہی تا درشانی ءِ کرے، وخت اس کہ لاہور ءِ بروک آ اسہ سال کن ایس سی او نا ربیدہ ئی دارالحکومت گوندنگ نا ہم ذکر کننگا‘ دفترِ خارجہ نا رِد اٹ ایس سی او ڈل آک پاکستان نیشنل کونسل آف دی آرٹس و نصیر بندہ ہاکی اسٹیڈیم نا دورہ ہم کریر‘ ایس سی او گوازی تا پروگرام نا رد اٹ ہاکی ٹورنامنٹ 20 نومبر آن 2 دسمبر اسکان اڈ ہلیک‘ ترجمان دفترِ خارجہ صومالیہ نا کرک آن خڑک بحری جہاز نا پدی اتنگ نا آپریشن اٹ کاریمی تا پنچ باسک انا زوال مننگ آ ڈکھ وارمان کرے۔ ترجمان نا رِد اٹ زوال مروک آتیٹی مسٹ پاکستانی شاری رفیع اللہ خان، سید کاشف عمر و محمود احمد انصاری اوار ءُ‘ واقعہ ٹی چار بندغ ٹھپی ہم مسر ہرافتے ٹی مسٹ پاکستانی شاری اوار ءُ‘ ٹھپی تے طبی کمک فراوان کننگ انگ ءِ و گوِرو شار اٹی اوفتے درمان کننگ انگ ءِ۔