پاک چین سنگتی ءِ پین سوگو کننگ نا ارادگی نا دوارگی،آصف علی زرداری

اسلام آباد، صدرِ مملکت آصف علی زرداری پاک چین سفارتی تعلقداری تا 75 می سال دے آ چینی صدر شی جن پنگ نا پن آ چٹھی ٹی ہڑتوم آ ملک آتا نیام اٹی متکن آ اسٹریٹجک شریداری ءِ پین ودفنگ نا ارادگی نا دوارگی کرینے‘ صدر سی پیک نا ارٹمیکو ریسہ ٹی آرٹیفیشل انٹیلیجنس، قابلِ تجدید توانائی و گرین مائننگ تون اوار پوسکنوڑ بشخ آتیٹی کمکاری ءِ ودفنگ آ زور شاغا؛ صدارتی سیکریٹریٹ نا رِد اٹ صدر آصف علی زرداری چین نا 77 می قومی دے آ تینا چٹھی ٹی پارے کہ پاک چین اقتصادی راہداری (سی پیک) ہڑتوم آ ملک آتا روایتی سنگتی و اسٹریٹجک کمکاری نا سوگو علامتی نشان ءِ‘ صدر پارے کہ سی پیک نا ارٹمیکو ریسہ پاکستان و چین اکن آرٹیفیشل انٹیلیجنس، قابلِ تجدید توانائی و گرین مائننگ نا بشخ آتیٹی اسیجائی شونداری و تین پہ تینی فائدہ نا پوسکن وارخواہی ودی کننگ اٹی ءِ او تدوک آ 77 سال اٹ چین نا زرگزرانی و راجی شونداری نا ستاءِ کرسا پارے کہ کروڑ آ بندغ آتے غریبی آن کشنگ چین نا اسہ نمان ءُ سرسہبی اسے‘ صدر زرداری چین نا جم زرگزرانی حکمت عملی، ”پوسکن آ آب انا پیداواری لائخی‘ و جہانی باندات آتے ٹی اونا ودوک آ کڑد ءِ ہم خراجِ تحسین پیش کرے‘ صدرِ مملکت پارے کہ پاکستان و چین برجا سال سفارتی تعلقداری تا 75 می سال دے ءِ اڈ تننگ اٹی ءُ۔ اوپارے کہ ہڑتوم آ ملک آتا ”آئرن کلاڈ“ سنگتی وخت انا آزماشت آتیٹی مدامگی نشان تسنے۔ وخت اس کہ تین پہ تینی اسٹریٹجک پت و اسہ ایلو نا بنداوی فائدہ غاتا مخ تفی دا تعلقداری نا اہم بنداو ءِ‘ آصف علی زرداری پارے کہ پاکستان چین اتون تعلقداری تے تینا خارجہ پالیسی تے بھاز اولیت ایتک و صدر شی جن پنگ تون اوار مرسا ”اسیجائی آخبت کن چین پاکستان کمیونٹی“ نا جوڑ کننگ نا عمل ءِ پین ترند کننگ خواہک‘ او اومیت درشان کرے کہ پاکستان و چین نا شریداری ڈیہہ اٹی امن و سوگوی و اسہ انصاف آ تالان جہانی نظام نا جوڑ کننگ اٹ تینا کڑد ءِ ادا کرسا کیک۔