نوکاپ آن زہمی کشت و کشار نا بشخ انا بحالی آ کاریم کننگ اُن، قدوس بزنجو

کوئٹہ: وزیراعلی بلوچستان میر عبدالقدوس بزنجو تون بلوچستان زمیندار ایکشن کمیٹی نا نمائندہ ڈل انا کروک اوڑدہی ٹی صوبہ ٹی پِر ونوکاپ آن ودی مروک حالیت‘ کشاری بشخ ءِ رسینگوک نسخان و نوکاپ نا سوب آن زمیندار تے مون تروک ویل آتتون اوارایلو امور تیا ہیت وگپ کننگا۔ وزیراعلی ءِ بلوچستان زمیندار ایکشن کمیٹی نا جنرل سیکرٹری عبدالرحمن بازئی کشاری بشخ ءِ رسینگوک نسخان تابابت بریفنگ ترسا پارے کہ اسہ کساس اسے نا رد اٹ بلوچستان اٹ پِر ونوکاپ آن 300 ارب روپئی نا نسخان مسنے و کل آن زیات زہمی مروک کشاری بشخ ءِ‘ نوکاپ نا حالیت آتا سوب آن کینال نا نظام‘ ٹیوب ویل و سولر سسٹم ءِ نسخان رسینگانے‘ ایکشن کمیٹی نا ڈل ہمسائے ملک آن گڑا درآمد کننگ آگڑتی درشان کرسا پارے کہ ہمسائے ملک آتیان سوزی و میوہ درآمد کننگ آن ہندی زمیندارک زہمی مریرہ و مارکیٹ اٹ اوفتا کشاری گڑاک کم نہاد آ بہا مریرہ‘ ڈل پارے کہ زہمی ضلع غاتے ٹی زمیندار تا بجلی نابل آتے بشخنگے‘ ہر زمیندار ءِ ڈغارءِ آوار کننگ کن 500 گھنٹہ ڈوزر و 250 گھنٹہ ٹریکٹر تننگے۔ڈل بنجائی حکومت آن صوبہ کن کشاری وام تا بشخنگ تون اوار صوبائی کہول آ کشاری بج و کھد آ زمیندار تے سبسڈی فراوان کننگ و نسخان تے پورو کننگ کن سروے ٹی زمیندارتا نمائندگی ءِ پک کننگ نا خواست کرے۔ڈل اتون ہیت وگپ کرسا وزیراعلی پارے کہ کشت وکشار نا بشخ ننا ملک انا زرگزران نا مخ ءِ و ملک انا زیات مخلوق نا روزگار ہم کشت وکشار ءِ‘ صوبہ ٹی نوکاپ نا حالیت آک نن کن امتحان و آزمائشت ءُ و قوم تیا آزمائشت وسخت انگا وخت آک بریرہ۔اللہ تعالیٰ انسان ءِ صبر وہمت تسنے ننے ہم دا سخت انگا دے اٹ صبر و ہمت کرسا اسٹ ایلو نا سیبو مروئی ءِ۔ اوپارے کہ زہمی علاقہ غاتے ٹی ریلیف ناکاریم تے دمدستی کننگک ولے زہمی تابحالی تا خاص چکار کننگپک‘ نن کوشست کننگ اٹی ان کہ کمکی سرجز آتتون اوار زہمی تا بحالی کن گام گیج کننگے و اوفتے دوارہ تینا نت تیا سلفنگے۔ وزیراعلی میر قدوس بزنجو وزیراعظم پاکستان نا منت ءِ ہرفسا پارے کہ نوکاپ اٹ او کیہی واربلوچستان نا زہمی ضلع غاتا دورہ ءِ کرے و کمک وبحالی نا کاریم تا تینٹ جاچ ءِ ہلسا کرے ہراکہ بنجائی حکومت ناکنڈآن ستا کڑزوک گام اسے۔ او پارے کہ نوکاپ آن مچ آبلوچستان زہمی مسنے و نن تون وسیلہ غاک ہم کچ اٹی ءُ‘ پی ڈی ایم اے و ضلعی انتظامیہ زہمی ضلع غاتے ٹی گچین وڑ اٹ کمکی سرجز آتے سر تننگ اٹی ءُ و ہر کس ہم جوان ءُ کاریم اس کے بایدے اونا ستاءِ کننگے۔ او پارے کہ دا گڑانا نفی ءِ کننگے کہ زہمی مخلوق اسکان کمک سرمفننگ ءِ‘ نن مخلوق اسکان وخت آ سر مننگ کن ضلعی انتظامیہ ءِ کمک وبحالی کن دمدستی فنڈ جاری کرین تاکہ کمک وبحای نا کاریم وخت آکننگ مرے۔کو امداد اور بحالی کے لیے فوری طور پر فنڈز کا اجرا کیا تاکہ امداد اور بحالی کا کام بروقت کیا جا سکے۔ ڈل اتون صوبائی وزیر کشت وکشار میراسداللہ بلوچ، چیئرمین زمیندار ایکشن کمیٹی ملک نصیر احمد شاہوانی، صوبائی نا باسک اسمبلی میر سلیم احمد کھوسہ، اصغر خان ترین و میر حمل کلمتی ہم ہیت وگپ کریر۔ دا وخت آ صوبائی اسمبلی نا باسک میر عارف جان محمدحسنی، ایڈووکیٹ جنرل بلوچستان محمد آصف ریکی ہم ساڑی ئس۔