آڈیو لیکس،بنجائی کابینہ نا عمران خان نا برخلاف کارروائی نا منظوری

اسلام آباد: بنجائی کابینہ سائفر نا آڈیو لیکس نا باندات آ مسکوہی وزیراعظم عمران خان‘ اسد عمر، شاہ محمود قریشی ومسکوہی سیکرٹری ٹو پرائم منسٹر اعظم خان نابرخلاف کانودی کارروائی کننگ نا منظوری تسنے‘ کابینہ ’ڈپلومیٹک سائفر‘ نابابت آڈیو لیک آ ایف آئی اے نا کمک اٹ جاست پاست و کانودی کارروائی نا منظوری ءِ تس‘ کابینہ 30 ستمبر آ عمران خان نا سائفر نا بابت آڈیو لیک آ کابینہ کمیٹی ٹہیفیسس‘ کمیٹی نا تہیفنگ آن پد کمیٹی یکم اکتوبر آ اڈ ہلوک دیوان اٹ کانودی کارروائی نا سلاہ تس‘ کابینہ کمیٹی نا سلاہ تے سمری نا دروشم اٹ کابینہ نا منظوری کن پیش کننگا ہراکان گڈ بنجائی کابینہ ’سرکولیشن‘ ناکمک اٹ کابینہ کمیٹی نا سلاہ تامنظوری ءِ تس‘ کابینہ کمیٹی تینا سلاہ اٹ پارینے کہ دا قومی سلامتی نا باندات اسے ہرانا قومی فائدہ غاتیان بھاز زہم تمانے‘ کانودی کارروائی المی ءِ‘ ا یف آئی اے سینئر کمامدار آتیا کمیٹی ٹہیفے‘ سلاہ اٹ پاننگانے کہ ایف آئی اے انٹیلی جنس ادارہ غاتیان ہم افسر و کارندہ غاتے ٹیم اٹ اوار کننگ کیک‘ ایف آئی اے نا ٹیم ڈوہ کروک آتا برخلاف کانود نا رد اٹ کارروائی کے۔ ڈپلومیٹک سائفر نا بابت عمران خان نا اولیکو آڈیو 28 ستمبر و ارٹمیکو آڈیو 30 ستمبر آ مون آبس۔ آڈیو لیکس ات عمران خان، اعظم خان، شاہ محمود قریشی و اسد عمر سائفر بدل کننگ نا بارو اٹ سلاہ کننگ اٹی ءُ‘ دا رد اٹ بنجائی حکومت سائفرنا آڈیو لیکس نا باندات آ کل ریکارڈ آتے ایف آئی اے ءِ تس‘ ایف آئی اے نا بڑکو کہولی کمیٹی ٹی عمران خان، اسد عمر، شاہ محمود قریشی و اعظم خان ءِ پگہ سَے شنبے نادے بٹنگ انگ نا گمان ارے‘ حوالی نا رد اٹ ایف آئی اے ءِ سائفر نا آڈیولیکس باندات آ ہندا ہفتہ ٹی جاست پاست ءِ پورو کننگ ناپرمان کننگانے‘ وخت اس کہ بنجائی کابینہ دیوان نافیصلہ و ایلو ریکارڈ آتے ایف آئی اے ءِ تننگانے‘ ایف آئی اے نابڑزکو کہولی جاست پاستی کمیٹی عمران خان، اسد عمر، شاہ محمود قریشی و اعظم خان ءِ ہم بٹنگک‘ پگہ سَے شنبے آ ہندا ہر چار آتے بٹنگ انگ نا نوٹس جاری مننگ ناگمان ارے‘ حوالی نا رد اٹ ایف آئی اے نا جاست پاستی ٹیم انا مون آ پیش مفننگ آ اوفتے دزگیر ہم کننگ مریک، ایف آئی اے نارپورٹ ءِ دوارہ کابینہ نا مون آ تخنگک‘ کابینہ نا رپورٹ نا رد اٹ آرٹیکل 6 انا رد اٹ کارروائی کن پارلیمنٹ نا مہر ہم خلنگک۔