سندھ انا ضلع عمر کوٹ اٹی احساس لنگر خانہ نا بنا مسنے ، ڈاکٹر ثانیہ نشتر

اسلام آباد (اے پی پی) مچ آ ملک اٹی احساس لنگرخانہ جوڑ کننگ انگ ءِ دارداٹ صوبہ سندھ انا ضلع عمرکوٹ اٹی احساس لنگرخانہ نا بنامسنے۔ وزیراعظم نا خصوصی کمکار راجی رکھ ڈاکٹر ثانیہ نشتر تینا ٹویٹ اٹی پارینے کہ سیلانی ویلفیئر ٹرسٹ انا کمک اٹ جوڑ کروک آ دا لنگر خانہ ٹی ہڑدے 300 بندغ ءِ کُن و خور مفت تننگک۔ گورنر سندھ عمران اسماعیل لنگر خانہ نا بناءِ کرے۔ داکان بیدس او پارینے داتم اسکان مچ آ ملک اٹی اسہ کروڑ 22 لکھ 77 ہزار آن زیات خواری کش بندغ آتے ٹی 148 ارب 59 کروڑ روپئی آن زیات کمکی زر تننگانے۔ آزاد جموں و کشمیر اٹی 2 لکھ 1 ہزار آن زیات بندغ آتے ٹی 2 ارب 46 کروڑ آن زیات کمکی زر تننگانے۔ بلوچستان اٹی 7ارب 56 کروڑ روپئی آن زیات کمکی زر 6لکھ 22 ہزار آن بندغ آتے ٹی بشخنگا۔ گلگت بلتستان اٹی 87 ہزار آن زیات بندغ آتے ٹی اسہ ارب 7 کروڑ روپئی آن زیات کمکی زر تننگانے۔ اسلام آباد اٹی 64 ہزار آن زیات بندغ آتے ٹی 78 کروڑ روپئی آن زیات کمکی زر تننگانے۔ خیبر پختونخوا ٹی 25 ارب 78 کروڑ روپئی آن زیات کمکی زر 21 لکھ 23 ہزار آن زیات بندغ آتے ٹی بشخنگا۔ پنجاب اٹی 54 لکھ 70 ہزار آن زیات بندغ آتے ٹی 66 ارب 23 کروڑ روپئی آن زیات کمکی زر تننگانے۔ سندھ اٹی 37 لکھ 6 ہزار آن زیات بندغ آتے ٹی 44 ارب 70 کروڑ روپئی آن زیات کمکی زر تننگانے۔