9مئی نا واقعہ غاک سجفوک ءُ سازش اس ئسرہ، عطاء تارڑ

اسلام آباد : وزیراعظم نا خصوصی کمکار عطا تارڑ پارینے کہ9مئی نا واقعہ غاک سجفوک ءُ ڈٹ اسے نا پد ئسر‘ شرپسند آتتون ہچ رعایت کننگپک‘ 9 مئی نا واقعہ غاتیا فوٹیج چلیفسا غوغا کننگا‘ نیاڑی تے زیزاریفنگ نا سجفنگ ہم مفک‘ پیشن ملک آن کمک و جہانی میڈیا نا چکار کن دروغ نا مہم چلیفنگا‘ نیاڑیک رکھوک ءُ و اوفتے مینوئل نا وڑ اٹ آسراتی تننگ انگ ءِ۔ دا خیال آتا درشانی ءِ او تدوک آدے پریس کانفرنس آن تران کرسا کرے۔ پاکستان مسلم لیگ ن نا راہشون پارے کہ پارٹی چیئرمین کارندہ غاتے پرمان کریسس‘ پلوک آ 70ارب روپئی قوم انا پیسہ غاک ئسر‘ فوجی ملکیت آتیا جلہو کروک آک ملکی سالمیت آ جلہو کرینو‘ اوپارے کہ قوم انا 190 ملین پاؤنڈ قومی خزانہ ٹی جمع کرفنگتو،9 مئی نا واقعہ غاتیا شہید گوندسا فوٹیج چلیفسا غوغا کننگا‘ ہرا واقعہ متویسس اودے اصل جوڑ کرسا پیش کننگا‘ دروغ نا فوٹو و ویڈیو تے 9 مئی تون لنک کننگ انگ ءِ۔ عطاتارڑ پارے کہ نیاڑی تے ریزاریفنگ نا کس سجفنگ ہم کپک‘ اسہ نیاڑی سے تون بیدادی متنے‘ پیشن ملک آن کمک و جہانی میڈیا نا چکار کن دروغ نا مہم چلیفنگا‘ نیاڑی جیل مینوئل نا وڑ اٹ آسراتی تننگانے و اوفک ہر وڑ اٹ رکھوک ءُ۔ اوپارے کہ ہر ہمو کاریم ءِ کننگ انگ ءِ ہرادے ڈوہی بندغ و ملک دشمن آک کیرہ‘ آفیشل اکاؤنٹ آن ٹویٹ کیرہ و ولدا اودے ڈیلیٹ کیرہ۔چناتا پن آ سیاست کننگپ۔ عطاتارڑ پارے کہ شرپسند آتے اوفتا کروک آتا سزا تننگک‘ اوفتتون ہچ ءُ رعایت اس کننگپک‘ کانود نا وڑاٹ اوفتا برخلاف کارروائی کننگک۔

(آن لائن)