کل خواست آک پورو، آئی ایم ایف سٹی تل ول کننگ ءِ، اسحاق ڈار

اسلام آباد :: بنجائی وزیرخزانہ سینیٹر محمد اسحاق ڈار پارینے کہ ملک ڈیفالٹ مفک و نئے سری لنکا جوڑ مریک‘ حکومتی گام گیج آتیان کیہی بشخ آتے ٹی گچینی بسنے‘ پاکستان مین آن پیش تمک و نن کل اواری اٹ صبر، ہمت وحوصلہ اٹ ملک ءِ زرگزرانی تنکی آن کشسا سوگو شونداری نا کسر آروان کینہ۔ دا خیال آتا درشانی ءِ او ایف بی آرہیڈکوارٹر اٹ اسلام آباد انڈسٹریل ایسوسی ایشن نا ڈل اتون پوسکن آ مالی سال انا بنجائی بجٹ کن سلابت کن اوڑدہی نا وخت آ کرے‘ دا وخت آ چیئرمین ایف بی آر عاصم احمد، وزیراعظم نا خصوصی کمکار طارق باجوہ وطارق محمود پاشا و ایف بی آر و وزارت خزانہ نا افسرآک ہم ساڑی ئسر‘ وزیرخزانہ پارے کہ ملک ہرا مشکل وخت آن گدینگ انگ ءِ حکومت کل شریدار آتا اواری اٹ ویل آتا مون ءِ تورک‘ ننا نیت سفا ءِ و ننا کوشست عبادت آن کم اف۔ وزیرخزانہ پارے کہ 2017 ٹی ٹیک آف کروک زرگزران ءِ تدوک آ چار اٹ نسخان رسیفنگا‘ ننا زرگزران 24میکو نمبر آن 47 پوزیشن آ ہنانے‘ نوکا و زرگزرانی تنکیک ننا زرگزران ءِ بھاز نسخان رسیفینو ولے الحمدللہ ننا ٹیم گچین کاریم کننگ اٹی ءِ‘ جوان ءُ گہوش و گچینی بننگ اٹی ءِ‘ کنوئی آ تیل وپٹرول نا نہاد اٹ اِرا ہفتہ ٹی اِرا وار کمتی کننگانے۔ وزیرخزانہ پارے کہ داکان مست اوپن مارکیٹ الوکہ وکل پیسہ غاک اسٹیٹ بینک اٹ ہنارہ ولے 1998 نا دھماکہ غان گڈ نن کیش فلو نا ویل آتا مون ءِ توننگ کن وڑوڈول اس پیدوا کرین‘ اِرا دے مست نن دا بابت اسہ پین دلیری ءُ فیصلہ اس کرین ہرانا فائدہ غاک اینو مون آ بسر‘ کریڈٹ کارڈ نا کاریم اٹ اتنگ آ بینکر آتے ڈالر ہلوئی تماکہ داڑان کن نن موکل تسونن داڑان ڈالر نا قدر اٹ گچینی بسنے۔ او پارے کہ آئی ایم ایف تون معاہدہ بے تک پد تمنگ اٹی ءِ‘ ننا کنڈآن کل گام گیج آک پورو ءُ‘ پیشن نا فنانسنگ نا خواست آتے ہم پورو کننگانے‘ او پارے کہ 2013 ٹی ہم ننا زرگزران ءِ مشکل مون تروک ئس‘ نن تون ہمو وخت آ ہم زرمبادلہ ناکوڑیک کم ئسر و ملک انا دیوالہ مننگ نا ہیت آک مسرہ ولے ہمو وخت آ ننا ٹیم پوریاگر و واپاری بندغ آتا کمک اٹ مشکل آتا مون ءِ توریسس‘ نن دا چیلنج آن خلپنہ۔ پاکستان مین آن پیش تمک و نن کل اواری اٹ اودے تنکی تیان کشنہ۔ وزیرخزانہ پارے کہ اسہ تماشہ اس لگوک ئس کہ ملک دیوالیہ مرسا سری لنکا جوڑ مریک‘ نئے ملک ڈیفالٹ مریک و نئے سری لنکا جوڑ مرک۔پاکستان اٹ بھاز کاریم نا واکداری کچ ارے۔ پاکستان آ وام ارے ولے 2 آن 3 ہزار ٹریلین نا میرات ہم ارے‘ بیرہ گیس پائپ لائن نانہاد 30 آن 40 ارب ڈالر آن زیات ءِ‘ کنا ایمان ءِ کہ ملک دوارہ ٹیک آف کیک۔ وزیرخزانہ پارے کہ نن پوریاگر‘ صنعتکار و کاروباری بندغ آتا اواری اٹ ملک ءِ تنکی تیان کشنہ۔ کل پیشن نا وام تے وخت آتننگ اٹی ان و آخبت نا پیشن نا زرتس تے ہم پک کننگ انگ ءِ۔ اوپارے کہ بجٹ اٹ بزنس کمیونٹی ناکنڈآن پیش کروک سلاہ تا جاچ ءِ ہلنگک و ہمو سلاہ تے بجٹ نا بشخ جوڑ کننگ نا کوشست کننگک۔ دا وخت آ ایسوسی ایشن نا ڈل وزیرخزانہ وایف بی آر نا ٹیم انا منت ءِ ہرفے۔

(آن لائن)