چوہدری پرویزالٰہی کرپشن نا مقدمہ غاتیٹی اُرا غان دزگیر

لاہور : مسکوہی وزیراعلیٰ پنجاب و پی ٹی آئی نا صدر چوہدری پرویزالٰہی ءِ دزگیر کننگا۔ چوہدری پرویزالٰہی ءِ اینٹی کرپشن پنجاب وپولیس اونا اُراغان دزگیر کرے‘ اودے ہمو وخت آ دزگیر کننگا ہراتم و گاڈی ٹی تولسا جاگہ اس ہناکہ۔ پرویزالٰہی آ منڈی بہاؤالدین وگوجرانوالہ ٹی کرپشن نا مقدمہ غاک درج ءُ‘ضمانت نا منسوخ مننگ آن پد ہم پرویزالٰہی عدالت اٹ پیش متوکہ۔ یات سلے کہ اینٹی کرپشن کورٹ منہ دے مست پرویزالٰہی نا عبوری ضمانت ءِ خارج کریسس۔ عبوری ضمانت نا خارج مننگ آن پد پولیس نا کارندہ غاک پرویزالٰہی نا گلبرگ اٹ ساڑی اُرا غا ہناسر‘ پولیس تون اوار اینٹی کرپشن نا ٹیم ہم ئس ولے پرویز الہی ءِ دزگیر کننگ کتویسر‘ ولے اسہ وار ولدا کارروائی کرسا اینٹی کرپشن پنجاب اودے لاہور اٹ ظہورالٰہی پیلس آن دزگیر کرینے‘ ہراکان گڈ پولیس ظہورالٰہی پیلس ءِ گھیڑ کرینے‘ ایلو کنڈآ ڈی جی اینٹی کرپشن پنجاب ہم پرویزالٰہی نا دزگیری ءِ پک کرینے۔ نگران صوبائی وزیر حوالکاری عامر میر پارینے کہ پرویز الہی اینٹی کرپشن ءِ درکار ئس‘او دزگیر کرینے تے‘ نن پرویز الہی ءِ دزگیر کتنن‘ ڈوہ انا وڑ اٹ کارروائی کننگک‘ اینو ہم مزاحمت مسنے‘ بلٹ پروف گاڈی ٹی نرنگ نا کوشست کریکہ‘ پولیس شیشہ غاتے پرغنگ ناکوشست کرے و او دزگیری تس۔ یات سلے کہ منہ ہفتہ ٹی اینٹی کرپشن پنجاب نا پولیس چندی وار چوہدری پرویزالٰہی ءِ دزگیر کننگ کن اونا اُراغا چھاپہ خلکوسس۔ گجرات اٹ کنجاہ و لاہور اٹ ساڑی ہنکین آ ہم دزگیری کن چھاپہ خلنگاسس۔

(آن لائن)