پاک ایران سیم آ دہشتگرد و فورس آتا نیام اٹ جنگ، 2 کارندہ شہید

راولپنڈی /کوئٹہ : پاک ایران سیم آ بلوچستان نا علاقہ سنگوان اٹ دہشت گرد آتا سکیورٹی فورس آتیا سم کاری نا سوب آن 2 سکیورٹی کارندہ شہید مسر۔ پاک فوج انا شعبہ تعلقات عامہ (آئی ایس پی آر) نا رد اٹ پاک ایران سیم آ بلوچستان نا علاقہ سنگوان اٹ دہشت گرد آک سکیورٹی فورس آتیاسم کاری کریر‘ سکیورٹی فورس آک ورندی کارروائی کرسا دہشت گرد آتاجلہو ءِ بے سہب کریر‘ ہڑتوم آ کنڈآن سم کاری آن سپاہی حسنین اشتیاق و سپاہی عنایت اللہ شہید مسر‘ سکیورٹی فورس آک علاقاہ ٹی دہشت گرد آتے پٹنگ نا آپریشن نا بناءِ کرینو‘ وخت اس کہ سکیورٹی فورس آک ایران کمامدار آتتون رابطہ کرسا دہشتگرد آتے توننگ نا بابت ہیت وگپ نابناءِ کرینو۔ آئی ایس پی آر نا رد اٹ علاقہ ٹی دمدستی آپریشن نا بناءِ کننگا‘ بلوچستان اٹ امن ناکوشست آتے لتاڑنگ نا کس ءِ موکل تننگ مفک۔وزیراعلیٰ بلوچستان میر عبدالقدوس بزنجو ضلع کیچ انا علاقہ سنگوان اٹ سکیورٹی فورس آتا چیک پوسٹ آ دہشت گرد آتا سم کاری ناواقعہ نا مذمت ءِ کرینے‘ وزیراعلیٰ سم کاری نا واقعہ ٹی اِرا سکیورٹی کارندہ نا شہید مننگ آارمان کرینے‘وزیراعلیٰ پارینے کہ سکیورٹی فورس آتا کارندہ غاک بہادری اٹ دہشت گرد آتا جلہو ءِ بے سہب کریر وداکان پد ہم امن دشمن تا مسخت آتے ہر حال اٹ بے سہب کننگک‘ امن کن وطن ناشہید آتا قربانیک بے بھرم ہنپسہ‘ مچ آقوم تینا شہید آتے سلام کننگ اٹی ءِ۔ وزیراعلیٰ شہید آتا درجہ غاتا بڑزی و اوفتا خاہوت آتیکن صبر انا دعا کرینے۔بنجائی وزیرداخلہ رانا ثناء اللہ خان بلوچستان نا علاقہ سنگوان اٹ دہشتگرد آتا کنڈآن سکیورٹی فورس آتیا سم کاری نا مذمت ءِ کرینے و شہید مروک ورناتے خراج عقیدت پیش کرے‘ تینا بیان اٹ وزیرداخلہ پارے کہ ننا فورس آک ہر وڑانا کارروائی نا مون ء توننگ کیرہ۔ دہشتگرد آتے بے سہب کننگ ننا فورس آتا گچین کسبی ہیلکاری نا شاہدی ءِ۔ وزیرداخلہ شہید مروک ورناتے خراج عقیدت پیش کرسا پارے کہ ہر پاکستانی تینا فورس آتیا گمر کیک‘ ملک دشمن آک تینا مسخت اٹ سرسہب مننگ کپسہ‘ او دعا کرے کہ اللہ تعالیٰ شہید آتا درجہ غاتے بڑزا کے و پدخاہوت آتے صبر ایتے۔

(آن لائن)