چیئرمین سینیٹ و اسپیکر قومی اسمبلی نا ایرانی سیم انا واقعہ نا مذمت

اسلام آباد: چیئرمین سینیٹ محمد صادق سنجرانی بلوچستان نا علاقہ سنگوان اٹی سیکورٹی فورس آتا چیک پوسٹ آ دہشت گرد جلہو نا ترندی اٹ مذمت ءِ کرینے۔ سینیٹ سیکرٹریٹ آن جاری بیان نا رداٹ چیئرمین سینیٹ صادق سنجرانی دہشت گرد آتا جلہواٹی شہید مروک آ کارندہ غاتا خاہوت تون دلی ہمدردی و ہڑزخواہی کرینے۔ چیئرمین سینیٹ دہشت گرد جلہو اٹی ٹھپی مروک آ سیکورٹی کارندہ غاتا زوت دراخ جوڑی کن دعا۔ اوپارے کہ دہشت گرد آک شونداری نا عمل ءِ توننگ خوارہ ہراٹی او اسُل سرسہب مفسہ۔ دہشت گردی نا برخلاف جنگ اٹی پاکستان نا سیوکرٹی فورس آک بے مٹ قربانی تسنو۔ ڈیہہ نا امن نا بقاکن سیکورٹی فورس آتا قربانیک زیان مفسہ۔ چیئرمین سینیٹ پارے کہ پاکستان ڈیہہ اٹی امن کن دہشت گردی نا برخلاف مدام توار بڑز کرسا کیک۔ داوڑنالغوری نا جلہو ملک انا امن و ایمنی نا حالیت آتے لتاڑنگ کپک۔ ڈپٹی چیئرمین سینیٹ سینیٹر مرزامحمد آفریدی ہم بلوچستان نا علاقہ سنگوان اٹی سیکورٹی فورس آتیا دہشت گرد جلہو نا ترندی اٹ مذمت ءِ کرینے۔ ایلوکنڈ آ اسپیکر قومی اسمبلی راجہ پرویز اشرف و ڈپٹی اسپیکر زاہد اکرم درانی بلوچستان نا ضلع کیچ اٹی پاک۔ایران سیم آ سیکورٹی فورس آتا چوکی آ دہشت گردی نا سم کاری نا مذمت ءِ کرینو۔ پنچ شنبے نادے آ تینا جتا جتا مذمتی بیان آتیٹی اوفک پاریر کہ دہشت گردی نا دا کارروائی ٹی سیکورٹی فورس آتا کارندہ غاتا نہادی جانی نسخان آ ڈکھیائی است ہسونی نا ہیت اسے، اسپیکر و ڈپٹی اسپیکر قومی اسمبلی شہیدآتا خاہوت آتون ہڑزخواہی کریر و پاریر کہ سیکورٹی فورس آتا کارندہ غاتا کنڈآن تینا جون تے دلدست آ تخسا دہشت گرد آتے پسپائی آ بیوس کننگ ستاکڑزک۔ دہشت گردی نا برخلاف جنگ اٹی سیکورٹی فورس آتا قربانی تے مدام یات تخنگک۔ مچ آ قوم دہشت گردی نا برخلاف جنگ اٹی سیکورٹی فورس آتا شہید مروک آ پاک فوج انا ورناتے خراج عقیدت پیش کیک۔ اسپیکر و ڈپٹی اسپیکر قومی اسمبلی اللہ تعالیٰ آن شہید آتا درجہ غاتا بڑزی و پدسلوک آ خاہوت آتے دا بے بدل نسخان ءِ سگنگ کن صبر وجمیل عطاکننگ نا دعاکریر۔

(اے پی پی)