یاسین ملک ءِ پاہو ترفنگ نا خواست گڑتی نا ہیت اسے، پاکستان

اسلام آباد: پاکستان بھارت نا کنڈآن عدالت آن پنی آ کشمیری راہشون محمد یاسین ملک ءِ پاہونا سزا تننگ نا خواست انا تازہ انگا گام آ گڑتی نا درشانی ءِ کرینے۔ دفترخارجہ نا ترجمان ممتاز زہرابلوچ پنچ شنبے نادے آ داڑے پریس حوال اٹی پارے کہ تدوک آ سال محمد یاسین ملک ءِ اسہ جھیڑہ ئی ءُ مقدمہ اسے ٹی عمر قید نا سزا بنفنگاسس، اوڑاسٹی ءُ دوبہ خلنگا و اودے انصاف اٹ ٹرائل آن انکار کننگاسس۔ ترجمان پارے کہ سرکڑدہ کشمیری راہشون ءِ بگڑینگوک آ جان جوڑی آن پد ہم بدنام زمانہ تہاڑ جیل اٹی غیر انسانی حالیت آتیٹی تخنگانے۔ اوپارے کہ محمد یاسین ملک ءِ خاہوت نا بندغ و وکیل آتسکان رسینگ تفننگ انگ ءِ و داڑتون اوار اوار اودے آب اٹ جان جوڑی نا درمان آن محروم تخنگ انگ ءِ۔ ترجمان پارے کہ بھارت نا تازہ انگا گام سیاسی انتقام نا اسہ پین درور اسے، ہرانا مسخت کشمیری سرکڑدہ غاتے خاموش کننگ و کشمیری الس ءِ خلیفنگ ءِ۔ اوپارے کہ دا گام بھارت نا غیر کانودی وڑاٹ کوزہ ٹی جموں و کشمیر اٹی بھارت نا چٹپروک آ و گیشتر جورانا درشانی ءِ ہراڑے سیاسی راہشون و انسانی حق انا رکھوک آتے سٹی و بے بنداو دوبہ غاتا رداٹ بند کننگک۔ ترجمان دفترخارجہ پارے کہ نن بھارتی کمامدارآتیا زور شاغنہ کہ او محمد یاسین ملک نا برخلاف فرضی مقدمہ ءِ چٹفر۔ اوپارے کہ کشمیری راہشون ءِ آب اٹ درمان فراوان کننگے و اودے تینا مخلوق و خاہوت نانیام اٹ آجووڑاٹ رہینگ انگ کن ہلنگے۔ ترجمان پاکستان نا دا خواست ءِ دُوارہ پاریکہ بھارت ءِ کشمیری سرکڑدہ و انسانی حق انا کارندہ غاتے ہم دمدستی و غیر مشروط وڑاٹ یلہ کننگے ہرافتے بھارت نا غیرکانودی وڑاٹ کوزہ ٹی جموں وکشمیر و بھارت نا زندان تیٹی بے سوب بند ی ٹی تخنگانے۔ ترجمان دفتر خارجہ پارے کہ وزیراعظم محمد شہباز شریف ترکیہ نا پوسکن گچین مروک آ صدر رجب طیب اردوان نا سلہ غا انقرہ نا دورہ ءِ کیک، وزیراعظم 3 جون آ صدر اردوان نا سوغندی دود اٹی بشخ ہلیک۔ او پارے کہ وزیراعظم نا دورہ پاکستان و ترکیہ نا نیام اٹ کڑمب ایلمی تعلقداری نا درشانی مریک۔ وزیراعظم 28 مئی نا گچین کاری تیٹی ترکیہ نا اسہ وار ولدا صدر گچین مننگ آ پاکستان نا حکومت و الس نا کنڈآن صدر اردوان ءِ مبارکباد پیش کیک۔ وزیراعظم ترکیہ نا صدر ءِ اسلام آباد اٹی مروک آ ہائی لیول اسٹریٹجک کوآپریشن کونسل نا ہفت می دیوان اٹی بشخ ہلنگ نا ہم سلہ خلیک۔

(اے پی پی)