پاکستان و سنگاپور نا واپار، زرکاری و چندی بشخ آتیٹی کمکاری ودفنگ آ امنا

اسلام آباد، پاکستان و سنگاپور واپاری‘ زرکاری، کشت وکشار‘ انفراسٹرکچر، ڈیجیٹل ٹیکنالوجی و ایلو اہم بشخ آتیٹی کمکاری ءِ پین ودفنگ آ امنا کرینو۔ ہڑتوم آ ملک آک سائبر سیکورٹی، موسمیاتی بدلی تا مون تننگ، کسبی ہیلکاری و آفت آتتون مون تننگ ناا واکداری ءِ گچین جوڑ کننگ کن ہم کمکاری ءِ ودفنگ نا ارادگی نا درشانی ءِ کرینو۔ ترجمان دفتر خارجہ نا رِد اٹ نائب وزیراعظم و وزیر خارجہ اسحاق ڈار نا سلہ غا سنگاپور نا وزیر خارجہ ڈاکٹر ویوین بالاکرشنن پاکستان نا سرکاری دورہ ءِ کرے، ہراٹی ہڑتوم آ راہشونک اوڑدہی کریر۔ اوڑدہی ٹی پاکستان و سنگاپور نا تین پہ تینی تعلقداری نا کل پہلو تا جم جاچ ءِ ہلنگا وخت اس کہ علاقائی و جہانی باندات آ ہم گپ وتران کننگا۔