مکہ اسیجائی دفاعی معاہدہ، اسٹریٹجک سیاسی و دفاعی کمیٹی نا اولیکو دیوان پاکستان، ترکیہ و سعودیہ نا دفاعی کمکاری ءِ پین سوگو کننگ و چندی بشخ آتسکان کمکاری ءِ ودفنگ نا فیصلہ

استنبول، مکہ اسیجائی دفاعی معاہدہ نا رِداٹ پاکستان، سعودیہ و ترکیہ دفاعی کمکاری ءِ سوگو کننگ و جتا جتا بشخ آتسکا دا کمکاری ءِ پین ودفنگ نا اہم فیصلہ کرینو، و دا پک مسنے کہ دانا پن ”مکہ دفاعی سیوت“ مریک دانا آخبتی سیکرٹریٹ ریاض اٹی مریک و پاکستان دانا اولیکو سیکرٹری جنرل مریک۔ ترکیہ نا وزیر خارجہ حاقان فیدان پارینے کہ ننا سیوت پین ہچ ءُ پن ریاست اسے نا برخلاف اف، نن پورو وڑ اٹ سیوت نا السی پنجر ءِ جوڑ کننگ نا بناءِ کرینن، ننا ہرمسٹ آ ملک آتا دا سیوت جہانی کانود نا رد اٹی ءِ‘ مکہ معاہدہ نیٹو نا پوروی ءِ کیک، ننا پک مروک شڑت آتیا ایلو ایلم ملک آک ہم داٹی اوار مننگ کیرہ و نن ایلو ملک آتا اوار مننگ نا روڈ میپ آ ہم کاریم کننگ اٹی اُن۔ مکہ اسیجائی دفاعی معاہدہ نا رِداٹ اسٹریٹجک سیاسی و دفاعی کمیٹی نا اولیکو اہم دیوان استنبول اٹی اڈ ہلک، ہراٹی پاکستان، سعودیہ و ترکیہ نا سرکڑدہ غاک دفاعی باندات آتیا جم خوڑت وڑ اٹ گپ وتران کریر۔ ترکیہ نا مہمانداری ٹی مروک دا دیوان اٹی جہانی و علاقائی سلامتی نا باندات و ہر مسٹ آ ملک آتا دفاعی کاریمی واکداری کچ ءِ پین سوگو کننگ آ سجفنگا۔ دیوان اٹی ہر مسٹ آ ملک آتا سلہہ بند فوج آتا نیام اٹی ہمگرنچی ءِ ودفنگ تون اوار دفاعی صنعت اٹی اسیجائی پیداوار، ریسرچ، ڈیولپمنٹ نا بشخ آتے ٹی کمکاری نا جاچ ءِ ہلنگا۔ دہشت گردی نا برخلاف اسیجائی کوشست آتے پین بھرمی کننگ نا اہم باندات ہم دیوان نا بنجائی ایجنڈا ٹی اوار ئس۔دیوان آن پد میڈیا ءِ بریفنگ تننگا۔ ترکیہ نا وزیر خارجہ ہاکان فیدان میڈیا بریفنگ اٹی پارے کہ مکہ معاہدہ دفاع نا اہم انگا اصول آتیاٹے‘ دا معاہدہ اسہ عظیم تاریخی گام اسے، اینو نا دیوان نا اصل مسخت علاقائی سوگوی و امن ءِ مونی دننگ ءِ۔ دیوان اٹی کروک اہم انگا فیصلہ غاک پورو بھرم ایترہ۔ او پارے کہ ڈیہہ اٹی امن کن کل علاقائی ملک آتے اسیجا مرسا گام گیج کننگ ناگرج ءِ۔ دیوان اٹی سیوت نا عملی پنجر ءِ جوڑ کننگ نا بابت ہیت مس، و معاہدہ مکہ ءِ باضابطہ وڑ اٹ “مکہ معاہدہ” نا پن تننگ آ امنا مس۔ ہاکان فیدان پارے کہ مکہ معاہدہ نیٹو نا پوروی ءِ کیک، ننا شڑت آتیا ایلو ملک آک ہم داٹی اوار مننگ کیرہ، نن ایلو ملک آتا اوار مننگ نا لائحہ عمل آ کاریم کننگ اٹی اُن، ننا سیوت پین ہچ ءُ ریاست اسے نا برخلاف اف، نن پورو وڑ اٹ سیوت نا پنجر جوڑ کننگ نا بناءِ کرینن و ننا ہرمسٹ آ ملک آتا دا سیوت جہانی کانود نا رِداٹی ءِ۔ او پارے کہ مکہ اسیجائی دفاعی معاہدہ اسہ تاریخی گام اسے، دیوان نا مسخت علاقائی امن و سوگوی نا شون تننگ ءِ‘ حاقان فیدان پارے کہ علاقائی ملک آتے امن کن اوار کاریم کننگ نا بھاز گرج ءِ‘ پاکستان، سعودی عرب و ترکیہ نا سیوت جہانی کانود آ تالان ءِ‘ او پیدوار کرے کہ ہر مسٹ آ ملک آتا دا سیوت کس انا برخلاف اف بلکہ امن کن ءِ۔ ترک وزیر خارجہ پارے کہ مکہ اسیجائی دفاعی معاہدہ ڈیہہ اٹی کمکاری و امن نا شون تننگ نا کنڈ آ اسہ تاریخی گام اسے، ہرمسٹ آ ملک تین پہ تینی کمک اٹ علاقائی امن و سوگوی کن تینا سرکڑدہ ہی کڑد ءِ ادا کیرہ۔