وزیر اعظم جمعہ غا کراچی آ کاہک، بھلو پیکیج اسے نا پڑو ئِ کیک، شبلی فراز

اسلام آباد(اے پی پی) بنجائی وزیر حوالکاری وشینکاری سینیٹر شبلی فراز پارینے کہ وزیراعظم عمران خان جمعہ نادے آ دورہ کراچی ٹی شار انا ویل آتاایسری کن جامع حکمت عملی نا پڑو ئِ کیک، وزیراعظم عمران خان پِرو نوکاپ زہمی تا کمک کن احساس پروگرام نا ارٹمیکو مرحلہ زوت بناکننگ نا پارت کرینے، نواز شریف ئِ کانود نا مون آ پیش مرسا سوج آتاورندی ئِ تروئی مریک، پاکستان دشمن سی پیک نا برخلاف چم کننگ ئُ، دا ملکی شونداری نا ڈٹ ئِ نن ثابت گامی اٹ داڑآ آنچ بننگ کن الیپنہ۔ داخیال آتا درشانی ئِ او سے شنبے نادے آ وزیراعظم عمران خان نا کماشی ٹی بنجائی کابینہ نا دیوان آن پد پی آئی ڈی ٹی میڈیا ئِ حوال ترسا کرے۔ وزیر حوالکاری وشینکاری پارے کہ بنجائی کابینہ نادیوان اٹی کراچی نا حالیت آتیا سرجم گپ وتران کننگا، وزیراعظم عمران خان تون اوار حکومت نا غٹ تر ہمدردیک کراچی ناالس تون ئُ، کراچی نامخلوق ہراحالیت آتیان گدرینگ انگ ئُ او غٹ انا مون آٹو، وزیراعظم عمران خان خواہک کہ کراچی نا حالیت آک گچین مریر، وزیراعظم عمران خان جمعہ نادے آ کراچی نا دورہ ئِ کیک، وزیراعظم نا دورہ ٹی سندھ حکومت، این ڈی ایم اے تون اوار تعلقدار کڑدہ غاتا سلابت اٹ کراچی نا ویل آتا ایسری نا بابت جامع حکمت عملی نا پڑو ئِ کیک، وزیراعظم عمران خان نا پیدوارموقف ئِ کہ کراچی کن ننا شریداری بایدے خاص انگا گام گیج آتیا مرے۔ اوپارے کہ کراچی ملک انا زرگزرانی مرکز ئِ، کراچی ئِ کنوئی ئُ دیر، سیوریج و ٹریفک کون آ ویل مون تروک ئِ، بنجائی حکومت دا ویل آتا ایسری کن ہروڑنا کمک فراوان کیک۔

talarpub.com