حکومت ورنا تے تینا نت تیا سلفنگ کن عملی گام گیج کننگ اٹی ءِ،اسسٹنٹ کمشنر افتخار ظہیر بلوچ

حکومت بلوچستان نا کمک اٹ بلوچستان رورل سپورٹ پروگرام (بی آر ایس پی) رائز نا رِد اٹ ڈسٹرکٹ کونسل ہال پنجگور اٹی حقدار ورنا تیٹی زرگزرانی بحالی و جند انا روزگار نا شون کن جتا جتا میرات آتا بشخ و پانٹ نا اسہ دود اس اڈ ہلک۔ دود انا خاص انگا مہمان اسسٹنٹ کمشنر پنجگور افتخار ظہیر بلوچ ئس۔ دا وخت آ تعلقدار محکمہ غاتا کمامدار، رائز پروگرام نا نمائندہ، راجی شخصیت و فائدہ ہرفوک آ ورنا تا بھلو کچ اس ساڑی ئس۔ دود اٹی حقدر بے روزگار ورنا و غریب نیاڑی تیٹی میرات بشخ و پانٹ کننگا۔ دود آن تران کرسا اسسٹنٹ کمشنر افتخار ظہیر بلوچ، ڈسٹرکٹ منیجر مجاہد ملازئی، کشور نظیر بلوچ و سرتاج وحید پاریر کہ حکومت بلوچستان ورنا تے واکدار کننگ و اوفتے زرگزرانی وڑاٹ تینا نت تیا سلفنگ کن عملی گام گیج کننگ اٹی ءِ۔ او پاریر کہ رائز پروگرام وزیراعلیٰ بلوچستان سرفراز بگٹی نا عزم انا اہم ءُ بشخ اسے ہرا نا کمک اٹ غریب و کم کٹیا کروک خاہوت آتے شرفدار ءُ روزگار نا وارخواہی فراوان کننگ انگ ءِ تانکہ او تین کن جوان آخبت نا بنداو ءِ تخنگ کیر۔ او پاریر کہ ورناک راج اسے نا کل آن نہادی آ میرات مریرہ‘ ہندا سوب آن حکومت اوفتا لائخی تے کاریم اٹ اتنگ کن جتا جتا شونداری ڈٹ آتیا عمل کننگ اٹی ءِ۔ او پاریر کہ دُن انگا پروگرام آک نئے بیرہ غریبی ٹی کمتی اتنگ اٹی کمککار مریرہ بلکہ ہندی زرگزران ءِ ہم سوگو کیرہ۔ اسسٹنٹ کمشنر فائدہ ہرفوک ورنا تیا زور شاغا کہ او تننگوک میرات آتیان پورو فائدہ ہرفر، خواری و دیانتداری ءِ تینا شعار جوڑ کیر و تینا پوریاگر ءِ سرسہب کرسا ایلوفتے کن ہم روزگار نا وارخواہی ودی کیر۔ دود انا اخیر اٹ رائز پروگرام نا رِد اٹ گچین مروک حقدار ورنا تیٹی جتا جتا میرات آک بشخ و پانٹ کننگار۔ فائدہ ہرفوک آک حکومت بلوچستان و ضلعی انتظامیہ نا منت واری ءِ ہرفسا دا گام ءِ ورنا تا زرگزرانی آجوئی، غریبی نا چٹفنگ و مدامگی روزگار نا شون نا کنڈ آ اسہ اہم ءُ پیش رفت اس گوندار۔