بھلا باسنی ٹی ماشکیل بجلی آن دُو سلوک، علاقہ ڈاک جوڑ، مخلوق خوار ءِ،نصیر کبدانی

بلوچستان نا سیمی علاقہ ماشکیل، ہرا تینا صحرائی ہند و بھلا باسنی نا سوب آن صوبہ نا کل آن باسن انگا علاقہ غاتے ٹی حساب مریک، دا وخت آ سخت ءُ تنکی اسے آن گدرینگ انگ ءِ۔ منہ دے مست بروک آ لوڑ وتہو انا سوب آن بجلی نا مین ٹرانسمیشن لائن ءِ بھاز نسخان مس ہراناسوب آن کم و ود 40 تمبہ تمار و مچ آ علاقہ بجلی آن محروم مس۔ ماشکیل اٹی دا دے تیٹی درجہ حرارت 48 ڈگری اسکان رسینگانے۔ صحرائی آب و ہوا، ترند آ دے و باسن آ تہو انا سوب آن ہڑدے ئی زند نا بھاز زہمی مننگ اٹی ءِ‘ دا سخت انگا حالیت آتیٹی بجلی نا پدریسہ بند مننگ الس نا خواری تے پین ودفینے۔ بجلی نا مفننگ آن اُرا تیٹی پکّھہ، ایئر کولر، دیر انا موٹر، فریج و ایلو المی الیکٹرک ازباب آک بند ءُ۔ بزرگ‘ نیاڑی، چنا و ناجوڑ بندغ آک بھلا باسنی ٹی زند گدریفنگ آ بیوس ءُ۔ ہیٹ اسٹروک، دیر انا کاختی، کنشت نا خراب مننگ و جتا جتا موسمی ناجوڑی تا تالان مننگ نا گڑتیک ہم ودانو۔ حالیت آک دا وخت آ پین ہم خراب مسنو انتئے کہ بجلی نا مفننگ آن تدوک آ مسہ دے آن موبائل نیٹ ورک و موبائل ڈیٹا سروس ہم بند ءِ‘ نیٹ ورک نا مفننگ آن شاریک تینا عزیز و قریب آتتون حال حوال کننگ کپسہ، پوریاگر آتے واپاری نابابت خواری پیش بننگ ءِ‘ وخت اس کہ ہلہلہ ئی طبی یا ایلو المی حالیت اٹی تعلقدار ادارہ غاتتون دمدستی رابطہ ہم مفک۔ مواصلاتی نظام نا بند مننگ الس ءِ راستی وڑاٹ دنیا غان کاٹ کرینے۔ ایلو کنڈ آ پوریاگر سرجز آک ہم سخت زہمی مسنو وخت اس کہ ہڑدے ئی کٹیا کروک آ مزور و چنکا پوریاگر آک ہم سخت گڑتی تا باٹی ءُ۔ ماشکیل مہالو آن بنداوی آسراتی تا کاختی نا گواچی ڈاک اسے‘ ہراڑے باسنی نا ترندی ایلو ہند آتا کچ اٹی بھاز زیات مریک۔ دا حالیت اٹی بجلی و مواصلاتی نظام نا بند مننگ الس کن سگنگ آن پیشن مسنے۔ حکومت بلوچستان، کیسکو نا بڑزکو کمامدار، ضلعی انتظامیہ، گچین مروک السی نمائندہ و تعلقدار ادارہ غاتیان خواست کننگانے کہ تموک آ تمبہ غاتا دمدستی خلنگ، ودکی کارندہ، مشینری و وسیلہ غاتا فراوانی ءِ پک کرسا ہلہلہ ئی بنداو آ بجلی ءِ بحال کننگے تانکہ موبائل نیٹ ورک و ڈیٹا سروس ہم بحال مرے و الس ءِ دا بھلا خواری آن نجات رسینگے۔