امریکہ و طالبان تا اسہ وار ولدا مذاکرات کن امنا

واشنگٹن،دوحا( آن لائن)اوغانستان اٹ امن و ایمنی و فوج انا کشنگ آ مروک آ معاہدہ غا پین گام گیج مسنے، امریکہ و طالبان کمامدار آک اسہ وار ولدا مذاکرات نا میز آ بسنو۔ امریکی کمامدار آتون حال احوال آ طالبان ترجمان پک کرینے۔ درملکی خبررساں ادارہ نا رپورٹ نا رداٹ طالبان ڈل و امریکی وزیرخارجہ مائیک پومپیو نا نیام اٹ ویڈیو کانفرنس نا کمک اٹ مذاکرات مس دا وخت اٹ انٹرااوغان ہیت و گپ و ڈیہہ انا سلامتی نا بابت ہیت وگپ کننگا۔ مائیک پومپیو و طالبان ڈل انا نیام اٹ مروک آ ہیت وگپ اٹ اوغانستان نا حالیت و مالو مروک آ تاریخی معاہدہ غاتیا ہم ہیت وگپ کننگا۔ ایلو کنڈآ ترجمان طالبان قطر دفتر مذاکرات ءِ پک کرے۔ سہیل شاہین پارینے کہ کانفرنس مذاکرات اٹ طالبان نا ڈپٹی ملا برادر ہم اوار مسر، طالبان پومپیو تون درملکی فوجی تا کشنگ و پین بندی تا یلہ کننگ آ ہیت کرے۔ ویڈیوکانفرنس اٹ انٹرا اوغان مذاکرات و جھیڑہ غاتیٹی کمتی آ ہم ہیت وگپ مس۔ رپورٹ نا رداٹ ہڑتوم آ فریق آتیٹی طالبان و اوغان حکومت نا نیام اٹ مذاکرات کن راضی مننگ آ ہم ہیت وگپ مس ۔ امریکی وزیر خارجہ دا گام گیج ءِ جوان گوندا۔