شیخ رشید نا سردار اختر مینگل نا بابت ہیت آتا مذمت ءِ کینہ، اسلم بھوتانی

کوئٹہ ( آن لائن ) آجو رکن قومی اسمبلی محمد اسلم بھوتانی بنجائی وزیر شیخ رشید نا سردار اختر جان مینگل و بلوچ قوم نا برخلاف کروک آ ہیت آتا مذمت ءِ کرسا پارینے کہ بنجائی وزیر نا لوز آک عمران خان نا ہچ ءُ خدمت اس کتنو وخت اس کہ اودے نسخان تسنو۔ داوڑ نا لوز دا ایوان و داڑے تولوک کل باسک آتا عزت نا برخلاف ءُ۔ ناراض مروک آتے شغان ترسا یا اوفتا کردار کشی ءِ کرسا اوفتے خوش کننگ کپسہ۔ دا خیال آتا درشانی ءِ او قومی اسمبلی ٹی تینا خیال آتا درشانی ءِ کرسا محمد اسلم بھوتانی پارے کہ سردار اختر جان مینگل بلوچستان نا اسٹ انگا سیاسی راہشون و اسہ اہم ءُ سیاسی جماعت اسے نا کماش اسے اگہ حکومت تون کروک آ سیوت ءِ پرغانے تو دا اونا جماعت نا ذاتی ءُ فیصلہ اسے ہراڑتون کنے اسُل کاریم اف، دانا برخلاف اسہ بنجائی وزیر اسے نا ہیت آک اسہ قوم و اسہ لیڈر اسے کن بھاز قابل مذمت ءُ، سیاست اٹ مخلوق سیوت ءِ پرغک ولدا اوار مریک مننگ کریکہ نوا پگہ اختر مینگل صاحب پدی بسکہ ولے بنجائی وزیر نا ہیت آک اونا درگہ ءِ بند کریر۔