کوئٹہ انٹرنیشنل ایئرپورٹ نا مین رن وے اپ گریڈ، آپریشنل کننگا

اسلام آباد : سول ایوی ایشن اتھارٹی نا ترجمان پارینے کہ کوئٹہ انٹرنیشنل ایئرپورٹ نا مین رن وے (L/31R13)ءِ اپ گریڈیشن آن پد آپریشنل کننگانے۔ چارشنبے نادے آتینا بیان اٹی اوپارے کہ مین رن وے آ اولیکو جہاز پی کے 325 (اسلام آباد۔ کوئٹہ) سہب انا 6 بجہ و 20 منٹ آ توس، و تولنگ نا وخت آ ایئرپورٹ منیجر و پروجیکٹ ڈائریکٹر ساڑی ئسر۔ اپ گریڈڈ رن وے آ دڑنگ آن پد جہاز انا پائلٹ آک ایئرپورٹ منیجر تون اوڑدہی کریر۔ پائلٹ آک اوڑدہی ٹی ایئرپورٹ منیجر ءِ پروجیکٹ پورو مننگ آ مبارکبادی تسر۔ پائلٹ آک پاریر کہ نن اسہ ہموار و زیباءُ لینڈنگ اسے آن چس ہلکن، رن وے آ خلوک پاپی لائٹ آک شاندار ءُ۔ ترجمان نا رداٹ اپ گریڈیشن آ 5 ارب روپئی نا خڑچ بس و رن وے پوسکن آ ایئر فیلڈ لائٹنگ سسٹم آن شُپ ءِ۔ اکیوکوڈ 4 ای جہاز کون آبوئنگ 777 و اونا بریبرجہاز ہروڑنا موسم و دن و نن اٹ دڑنگ کیرہ۔ وزیراعلیٰ بلوچستان میر عبدالقدوس بزنجو کوئٹہ انٹرنیشنل ایئرپورٹ نا مین رن وے نا اپ گریڈیشن و فعالی آ خوشی درشان کرسا دا اہم انگا ڈٹ انا پورو مننگ آ سول ایوی ایشن ءِ مبارکبادی تسنے۔ وزیراعلیٰ ایئرپورٹ مینیجر و پراجیکٹ ڈائریکٹر ناکارکڑد نا سفت ءِ کرسا پارے کہ پنچ ارب روپئی نا خڑچ آن جوڑ کروک رن وے پوسکن آ ائرفیلڈ لائٹنگ سسٹم آن شُپ ءِ۔ داسہ کوئٹہ ٹی بوئنگ 777 و دانا کچ انا جہاز آک ہر وڑ انا مُد (دے ونن) اٹ دڑنگ کیرہ۔ او پارے کہ صوبائی دارالحکومت کوئٹہ تینا جغرافیائی دنگ وسیم انا سوب آن اہم ءُ شار اسے‘ ایران و اوغانستان آن خڑک مننگ ناسوب آن کوئٹہ نا اہم ءُ واپاری اہمیت اسے و بھلا جہاز آتا لینڈنگ نا آسراتی آن صوبہ ٹی واپاری و سیل سواتی سرجز آک ودرہ۔ وزیراعلیٰ پارے کہ کوئٹہ نا الس ءِ ڈٹ انا پورو مننگ آن فضائی سفر نا جوان آسراتی رسینگک‘ او اومیت درشان کرے کہ پی آئی اے تون اوار ا یلو فضائی کمپنیک ہم کوئٹہ غان تینا جہاز آتا کچ ءِ ودفرہ۔

(آن لائن/اے پی پی)