بلوچستان ہیلتھ کارڈ پروگرام و اسٹیٹ لائف نا نیام اٹ معاہدہ

کوئٹہ : بلوچستان ہیلتھ کارڈ پروگرام محکمہ جانجوڑی و اسٹیٹ لائف انشورنس کمپنی نا نیام اٹ معاہدہ نا دود اڈہلک‘ صوبائی وزیر جانجوڑی سید احسان شاہ، چیئرمین بی آر اے نورالحق بلوچ، چیئرمین اسٹیٹ لائف شیعب جاوید حسین، سیکرٹری جانجوڑی اسفندیار خان، ایگزیکٹو ڈائریکٹر اسٹیٹ لائف منظور علی شیخ، عبدالشکور شیخ وایلو کمامدار آک دود اٹ ساڑی ئسر‘۔ داوخت آ چیف ایگزیکٹو آفیسر بلوچستان ہیلتھ کارڈ پروگرام اسداللہ کاکڑ و ڈویژنل ہیڈ اسٹیٹ لائف انشورنس کمپنی محمد عشر ہیلتھ کارڈ ایگریمنٹ آ باقاعدہ دستخط کریر۔ دود آن صوبائی وزیر جانجوڑی سید احسان شاہ تران کرسا پارے کہ صحت کارڈ نا بابت اسٹیٹ لائف تون معاہدہ ستا کڑزک‘ او پارے کہ جانجوڑی نا بشخ حکومت نا اولیت آتا لڑ اٹ کل آن مون اٹی ءِ۔ وزیراعلی بلوچستان میر عبدالقدوس بزنجو خصوصی وڑ اٹ پرمان کرینے کہ صحت کارڈ نا زوت جاری کننگ ءِ اولیت تننگے۔ صوبائی وزیر جانجوڑی مستی پارے کہ بلوچستان ہر ہر ہمو باتی ہرا گدان یا مَش و کرکی علاقہ غاتے ٹی رہینگ انگ ءِ دا پروگرام آن اوفتے فائدہ مریک ہرافتے 10 لکھ روپئی اسکان درمان نا مفت آسراتی رسینگک۔ او عزم کرے کہ 2 تُو اٹ باقاعدہ صحت کارڈ لانچ کننگک و پینل آ ساڑی ہر ہسپتال اٹ باقاعدہ اسہ معلوماتی سینٹر اس ہم جوڑ کننگک۔ او دا گڑاغا زور شاغا کہ میڈیا دا تاریخی پروگرام ءِ مونی اتنگ کن کڑد ادا کرے۔ چیئرمین بی آر اے نورالحق بلوچ تران کرسا پارے کہ صحت کارڈ راجی رکھ انا بھاز اہم ءُ پروگرام اسے‘ داکان مست 8 بلین روپئی آن بلوچستان انڈومنٹ فنڈ آن ہم ناجوڑ آتے درمان کن کمک تننگ انگ ءِ۔ او پارے کہ صحت کارڈ پروگرام آن مر انگا علاقہ غاتا مخلوق ءِ فائدہ مریک۔ چیئرمین اسٹیٹ لائف شیعب جاوید حسین تینا خیال آتا درشانی ءِ کرسا پارے کہ اسٹیٹ لائف رئیل ٹائم سروس فراوان کیک‘ بلوچستان حکومت تون معاہدہ اسٹیٹ لائف کن گمر نا ہیت اسے۔ سیکرٹری جانجوڑی اسفندیار خان تینا خیال آتا درشانی ءِ کرسا پارے کہ صحت کارڈ جانجوڑی نا بشخ اٹ گیم چینچر اس مریک‘ دا بابت ہر وڑ انا کمک کننگک۔ سی ای او بلوچستان ہیلتھ کارڈ پروگرام اسداللہ کاکڑ مہمان تے بخیرکرسا پارے کہ یونیورسل ہیلتھ کوریج پروگرام بلوچستان اٹ ہر شاری ءِ فراوان کروک اسہ اہم ءُ پروگرام اسے‘ ہر خاہوت ءِ ہیلتھ کارڈ کمک نا رد اٹ مچ آ ملک انا 1200 ہسپتال اٹ درمان نا مفت آسراتی تننگک۔ داکان مست محمد عشر ڈویژنل ہیڈ اسٹیٹ لائف بریفنگ ترسا پارے کہ 34 ضلع ٹی 20 لکھ خاہوت ءِ صحت کارڈ آن فائدہ مریک۔ 24/7ہیلپ لائن جوڑ کننگانے‘ ہر ہسپتال اٹ ’سہولت ڈیسک‘ جوڑ کننگک‘ رئیل ٹائم ڈیٹا و مانیٹرنگ نا جوان ءُ نظام اس جوڑ کننگک۔ اومستی پارے کہ بلوچستان نا ہر باتی نا قومی شناختی کارڈ اونا صحت کارڈ مریک۔

(خ ن)