السی خذمت و گڈ گورننس اٹ محتسب تا کڑد اہم ءِ، صدر علوی

کوئٹہ : صدر مملکت ڈاکٹر عارف علوی تین پہ تینی جھیڑہ و جنگ نا حالیت آتیان بچنگ کن چنکا مقدمہ غاتے زوت سر تننگ ناگرج آ زور شاغسا پارینے کہ السی خذمت و گڈ گورننس اٹ بنجائی صوبائی محتسب آتا کڑدار اہم ءِ‘چار شنبے نا دے اسہ سیمینار اسے آن تران کرسا صدر مملکت ڈاکٹر عارف علوی پارے کہ 2017 ٹی قومی اسمبلی نا باسک انا وڑ اٹ ای روایتی عدالتی نظام آ باریم ءِ کم کننگ کن جھیڑہ غاتے ایسر کننگ نا بابت اسہ بل اسے نا منظوری کن فعال وڑ اٹ کاریم کریٹ۔ ڈاکٹر عارف علوی پارے کہ سکیورٹی ویل آتا سوب آن ”زوم میٹنگز” کون آ آن لائن سیٹ اپ نا بست وبند نا آزموندہ ہم کننگانے تاکہ لس مخلوق ءِ وخت آانصاف رسینگ ءِ پک کننگ مرے۔ صدر پارے کہ ای تدوک آ نن بنجائی محتسب نا 10 مقدمہ ءِ سر تسٹ و لس وڑ اٹ ای اپیل آتا مقدمہ غاتے بیرہ منہ گھنٹہ ٹی سر ایتوہ۔ صدر محتسب نا کڑدار نا بارو اٹ شعور مونی اتنگ نا گرج آزور شاغا انتئے کہ دا وخت آ بھاز کم بندغ ءِ دانا کڑدار ناسماءِ‘ اوسرکاری افسر والس مخلوق نا نیام اٹ رابطہ غاتا کسر اٹ اڑاند آتے ایسر کننگ نا ہم پارت کرے‘ اوپارے کہ اسلام راج اٹ امن وہم آہنگی کن مخلوق ءِ صبر و درگزر نا سبخ ایتک‘ قوم اس سہی معنہ اٹ اسلام نا اقدار و تعلیمات آتیا عمل کرے تو اودے پین درملکی کمک ناگرج مفک۔ حضور نبی اکرم صلی اللہ علیہ وآلہ وسلم و اونا صحابہ کرام ؓ تا زند انا ذکر ءِ کرسا صدر ملک انا ایگزیکٹو تے ہم پارے کہ او ہم اوفتا رند ءِ ہلیر و لس بندغ آنبار زند کیر‘ نیاڑی تا حق انا اہمیت و راج اٹ اوفتا اواری نا بارو اٹ ہیت کرسا صدر پارے کہ اسلام اولیکو مذہب ءِ ہرا نیاڑی تے میرات تننگ آ زور شاغانے و قرآن مجید اٹ داڑا وضاحت تون اوار زور شاغنگانے‘ زند انا ہر بشخ اٹ نیاڑی تا اواری ءِ پک کننگ نا زور شاغسا صدر عارف علوی پارے کہ ملک انا 52درسَد آبادی ءِ گوجالنگ مفک‘ نیاڑی تے مونی ہننگ کن وارخواہی و جوان ءُ چاگڑد اس فراوان کننگ نا گرج ءِ۔

(ہ ا)