ڈاکٹر عافیہ تون ایڑھ ڈاکٹر فوزیہ نا 20 سال آن پد اوڑدہی

واشنگٹن : امریکہ ٹی بندی پاکستانی ڈاکٹر عافیہ صدیقی تون اونا ایڑھ ڈاکٹر فوزیہ صدیقی 20 سال آن پد اوڑدہی کرینے‘ جماعت اسلامی نا سینیٹر مشتاق احمد خان راجی رابطہ نا ویب سائٹ آ دا پیش رفت ءِ پک کرسا ڈاکٹر فوزیہ نا اوڑدہی نا است ہسون کروک حوال ءِ بنفے۔ اوپارے کہ ایہن تو حالیت گڑتی نا سوب ءِ ولے اوڑدہی و ہیت وگپ نا کسر ملنگا۔ اوپارے کہ دا اوڑدہی بیست سال آن پد ہم مسنے ہرا دونیم گھنٹہ اسکان برجا سلیس‘ا وڑدہی نا وخت آ بھاز است ہسون کروک ندارہ خننگا۔ ڈاکٹر فوزیہ صدیقی ءِ ڈاکٹر عافیہ صدیقی تون بانکرکننگ‘ دوہلنگ نا موکل تننگویسس‘ ڈاکٹر فوزیہ ءِ دا ہیت انا ہم موکل تننگو کہ او ڈاکٹر عافیہ صدیقی ءِ اونا چناتا فوٹو تے نشان تننگ کے‘ سینیٹر مشتاق احمد مستی پارے کہ جیل اٹ اسہ کمرہ سے ٹی نیام اٹ اسہ ہولن ءُ شیشہ اس خلنگاسس و اونا داپار ایپار آن دا اوڑدہی مس‘ عافیہ پیہن ءُ اسکارف و خاکی جیل ڈریس بیناسس‘ او پارے کہ دونیم گھنٹہ ٹی اولیکو اسہ گھنٹہ ٹی ڈاکٹر عافیہ صدیقی ہڑدے تینا آ مروک بیدادی تا سرجم تیان معلومدار کرے۔او مستی پارے کہ ڈاکٹر عافیہ صدیقی پارے کہ کنے تینا آئی و چناک بھاز یات بریرہ‘ اودے اونا لمہ نا کزیت نا سما اف‘ اوپارے کہ ڈاکٹر عافیہ صدیقی نا مون نا اِرا دنان جیل اٹ جلہو اٹ پنانو‘ اونا کاٹم آ ٹھپ انا سوب آن مچے کم بنگکہ۔ سینیٹر مشتاق احمد مستی پارے کہ داسہ گرج دا گڑاناءِ کہ الس توارچست کے و حکمران آتے بیوس کے کہ او دمدستی گام گیج کرسا ڈاکٹر عافیہ صدیقی ءِ یلہ کننگ نا باندات ءِ امریکی حکومت تون چست کیر۔ او مستی پارے کہ پگہ ڈاکٹر عافیہ صدیقی تون ای ڈاکٹر فوزیہ صدیقی و کلائیو اسٹا فورڈ اسمتھ تون اوار جیل اٹ اوڑدہی کیوہ۔

(آن لائن)