نیمہ مارشل لا لگوک ءِ، جی ایچ کیو نا مون آ برانز ننا حق ءِ، عمران خان

اسلام آباد : پاکستان تحریک انصاف (پی ٹی آئی) نا چیئرمین عمران خان پارینے کہ نیمہ مارشل لا تو لگانے‘ جی ایچ کیو نا مون آ برانز کننگ ننا حق ءِ‘ فوجی عدالت آتے ٹی شاری تا مقدمہ غاک چلینگار تو جمہوریت تو چٹانے۔برطانوی میڈیا ءِ انٹرویو ٹی پی ٹی آئی نا چئیرمین عمران خان پارے کہ آئین وکانود ننے پرامن برانز کننگ نا موکل ایتک۔ جی ایچ کیو نا مون آ برانز کننگ ننا حق ءِ‘ تہٹی پارٹی نابندغ آک ہنتوس بلکہ او تو تہٹی ہنوک آتے توریرہ۔ عمران خان 9مئی نا واقعہ غاتا بابت پارے کہ خاخر تو چار پنچ بندغ جاگہ غا لگا ہرافتے ٹی کور کمانڈر ہاؤس و ریڈیو پاکستان پشاور کون آ جاگہ غاک ہسر‘ ہموڑے تو کیمرہ مروءِ‘ سیف سٹی نا کیمرہ غاک ءُ‘ کل گڑاک معلوم مریرہ‘ دا انکوائری تو بھاز آسان ءِ۔ چیئرمین پی ٹی آئی پارے کہ اگہ فوجی عدالت آتے ٹی شاری تا برخلاف مقدمہ غاک چلینگرہ‘ جمہوریت تو چٹانے‘ نیم مارشل لاء تو لگانے۔ اوفتا مسخت پی ٹی آئی ءِ چٹفسا نوازشریف ءِ بحال کرفنگ ءِ۔ او پارے کہ پی ٹی آئی ءِ گچین کاری تے ٹی سرسہب مننگ کن داسہ الیکٹ ایبل تا گرج اف‘ ننا وونٹ بینک بھاز زیات ءِ‘ ہراتم وونٹ بینک داخس زیات مس تو کس انا ہننگ بننگ آن ہچ فرق تمپک۔ مذاکرات نا سلہ غا حکومت نا کنڈآن ورندی رسینگپننگ نا بارو اٹ عمران خان پارے کہ مذاکرات تو مرسا کرینے ولے ایلو کنڈآن ہچ ءُ رسپانس اس اف‘ مذاکرات ہمو خوارہ ہرافک ایسر اس خوارہ و ایسر گچین کاری ءِ‘ اوفک دا خواپسہ ہندا سوب آن مذاکرات آن نرنگ اٹی ءُ۔ عمران خان مستی پارے کہ حکومت پی ٹی آئی نا 23ہزار کارندہ نا لڑ اس جوڑ کرینے‘ ہرافتیان دَہ ہزار ءِ دزگیر کننگانے۔

(آن لائن)