آئی ایم ایف نا نہمی ریویو کن شڑت آک پورو ءُ، اسحاق ڈار

فیصل آباد/ اسلام آباد : بنجائی وزیر خزانہ سینیٹر اسحاق ڈار پارینے کہ آئی ایم ایف نا 9می ریویو نا رد اٹ 172ارب نا خراج تون اوار ایلو کل شڑت آتے پورو کننگانے‘ ہندا سوب آن پدتمنگ آن پد ہم ڈیفالٹ نا ہچ ءُ گمان اس اف‘ منہ سیاستدان دا بارو اٹ بے سوب بے یقینی نا حالیت ودی کننگ اٹی ءُ‘ تہہ و پیشن ملک آن پاکستان نا دیوالیہ مننگ نا خبر تے تالان کننگ انگ ءِ‘ وخت اس پاننگک کہ پاکستان بانڈ آتے پدی تننگ کپک ولے کل درملکی وام تے وخت آپدی تننگا‘ ہندا سوب آن فریشانی نا ہچ ءُ ہیت اس اف‘ نن پورو دیانتداری و تینا لائخی تا وڑ اٹ کوشست کننگ اٹی ان۔ او پارے کہ شیفی نا کنڈآ ہننگ نا چرجوئی داسہ سلیسنے ولے زرگزرانی ناپورو بحالی ٹی منہ وخت لگک‘ مشکل مالی حالیت آتیان پد ہم پاکستان ڈیفالٹ کپک وخت اس کہ حکومت زرگزرانی شونداری ءِ تیز کننگ کن الس‘ صنعت و واپاری دوست بجٹ پیش کننگ نا ہر وڑ اٹ کوشست کیک۔ دا ہیت آتے او ایف بی آر ہاؤس اٹ فیصل آباد چیمبر آف کامرس اینڈانڈسٹری نا ڈل اسے تون ہیت وگپ کرسا کرے‘ ہرا صدر ڈاکٹر خرم طارق ناکماشی ٹی اوڑتون بجٹ سلاہ تا بابت اوڑدہی کرے و اودے صنعت و تجارت ءِ مون تروک حقی آ ویل آتیان معلومدار کرے۔ ڈل اٹ فیصل آباد چیمبر آف کامرس اینڈانڈسٹری نا نائب صدر حاجی محمد اسلم بھلی، ایگزیکٹو باسک شفیق حسین شاہ، ایگزیکٹو باسک مقصود اختر بٹ، ایگزیکٹو باسک فیصل علی، ایگزیکٹو باسک رانا عامر رضا، ایگزیکٹو باسک غلام حسین ومسکوہی ایگزیکٹو باسک شیخ محمد فاضل اوار ئس۔ داوخت آ وزیراعظم نا خصوصی کمکار فنانس طارق باجوہ، ریونیو نابارو اٹ وزیراعظم نا خصوصی کمکار طارق محمود پاشا، وزیر مملکت برائے فنانس اینڈ ریونیو گودی عائشہ غوث پاشا، چیئرمین ریفارمز اینڈ ریسورس موبلائزیشن کمیٹی نا چیئرمین اشفاق تولہ، سیکرٹری فنانس، چیئرمین ایف بی آر، فنانس ڈویژن و ایف بی آر نا بڑزکو افسر آک ہم ساڑی ئسر۔ وزیرخزانہ پارے کہ پاکستان آئی ایم ایف نا 9 می ریویو نا رد اٹ 172ارب نا خراج تون اوار ایلو کل المی شڑت آتے پورو کرینے‘ ہندا سوب آن پدتمنگ آن پد ہم ڈیفالٹ نا ہچ ءُ گمان اس اف۔ او 1998-99ء نا ایٹمی دھماکہ غاتیان گڈ لگوک اقتصادی رکھ آتا ذکر ءِ کرے و پارے کہ ہمو وخت آ ہم ملک ءِ مشکل حالیت آک مون تروک ئسر ولے نن ہمو ویل آتے ایسر کرین۔ اسحاق ڈار پارے کہ داٹی شک اف کہ داسہ زرگزران نا کچ بھاز زیات مسنے ولے حکومت بزنس کمیونٹی نا کمک اٹ حالیت آتا مون ءِ توننگ کن کوشست کننگ اٹی ءِ۔ اوپارے کہ زرگزران بجلی نا سوئچ اف ہرادے آن اور آف کننگے‘ دانا بحالی ٹی وخت لگک‘ او تدوک آ دور انا بابت پارے کہ دھماکہ غاتیان پد اولیکو سال بھاز مشکل ئس ولے ارٹمیکو سال جوان و مسٹمیکو سال داڑان ہم زیات گچین مس۔ ہمو وخت آ پاکستان دنیا نا 24میکو بھلا زرگزران ئس وخت اس کہ اسٹاک مارکیٹ اٹ ریکارڈ ودکی مس‘ او پارے کہ ہمو وخت آ جہانی ادارہ غاتا سروک سرینا و میریٹ ہوٹل اٹ تولسا پاکستان نا زرگزران ناسفت ءِ کریرہ۔ اوپارے کہ داسہ ہم شونہالی نا دور زوت پدی بریک و نن اواری اٹ ملک ءِ مشکل حالیت آتیان کشنہ۔

(آن لائن)