کورونا وائرس لاک ڈاﺅن، نصیر آباد نا فلور مل آتا مفت نت نسنگ نا پڑو

تمبو (آن لائن) کوروناوائرس و لاک ڈاﺅن نا سوب آن آٹا چکی فلور ملزایسوسی ایشن نصیرآباد نُت انا نہاد آتے ٹی کمتی و مفت نُت نسنگ ناپڑو کرے۔ دا ہیت انا پڑو ءِ اسسٹنٹ کمشنر ڈیرہ مراد جمالی غلام حسین بھنگر ناکماشی ٹی انجمن تاجران نا اڈ ہلوک دیوان اٹ صدر غلام نبی بنگلزئی، جنرل سیکرٹری غلام سرور ابڑو و عبدالطیف بگٹی اسک کریر۔او پاریر کہ ملک اٹ کورونا وائرس نا سوب آن برجا لاک ڈاﺅن آن کل آن زیات مزور تپّہ زہمی مننگ اٹی ءِ ہرافتے کنوئی آ گڑاتا کاختی مون تروک ءِ۔ ڈیرہ مراد جمالی شار اٹ برجا لاک ڈاﺅن اٹ روزانہ کروک غریب و مزور تپّہ ءِ ریلیف رسیفنگ کن آٹا چکی/ فلور ملز ایسوسی ایشن نصیرآباد امنائی اٹ فیصلہ کرینے کہ مچ آ شار اٹ آٹا چکی فلور ملز الس ءِ سبسڈی تننگ کن یکم اپریل سہب انا 8 بجہ غان ننکان 8 بجہ اکان الس و مزور تپہ کن مفت نُت نسک وخت اس کہ اینو آن نُت انا اسہ من انا نہاد ءِ 1850 آن کم کرسا 1750 کننگانے۔ دا وخت آ اسسٹنٹ کمشنر ڈیرہ مراد جمالی غلام حسین بھنگر انجمن تاجران نا منت ءِ ہرفسا پارے کہ حکومت و ہندی انتظامیہ تون پوریاگربرادری نا کمک ستا کڑزک‘ الس ءِ ریلیف رسیفنگ کن حکومت ہر وڑ انا گام گیج کننگ اٹی ءِ‘ پوریاگر برادری ہم الس ءِ ریلیف رسیفنگ کن حکومت و ہندی انتظامیہ تون سلوک ءِ۔ دیوان اٹ چیف آفیسر میونسپل کمیٹی ڈیرہ مراد جمالی حاجی میر آزاد خان گرانی، انجمن تاجران نصیرآباد نا صدر کامریڈ تاج بلوچ وایلوفک ہم ساڑی ئسر۔