قلات ناالس ءِ زور اٹ کورونا غان زہمی کننگ نا سازش مننگ ءِ،آل پارٹیز

قلات (حوال فیض نیچاری) قلات ءِ ہر حوالہ اٹ آزموندہ جا جوڑ کننگانے‘ قلات ءِ بے وارث جوڑ مننگ کن الیپنہ‘ کورونا وائرس نا زہمی زائر آتے قلات نا پرنس آغا عبدالکریم خان میموریل ہسپتال اٹ گدریفنگ نا ڈٹ بندی کننگ انگ ءِ ہراکہ قلات ناالس ءِ زوت اٹ کورونا غان زہمی کننگ نا سازش اسے‘ قلات اٹ داسکان دا دَین انا ڈس ونشان اف ولے رزاک آ قلات ناالس ناجان تتون گوازی کننگ نا ڈٹ بندی مننگ ءِ‘ اگہ حکومت زائر آتے قلات ہسپتال آ گدریفنگ نا فیصلہ کرینے تو اودے پدی ہَلے‘ آخا تو نن لاک ڈاﺅن و تینا جان تے پرواہ ءِ کپنہ و الس تون برانز کرسا روڈآ پیش تمنہ۔ دا خیال آتا درشانی ءِ آل پارٹیز نا راہشون میر قادربخش مینگل، میر منیراحمد شاہوانی، حاجی عزیز مغل، سردارزادہ ارباب نعیم جان دہوار، مولانا عبدالرحمان رحمانی، حافظ محمد قاسم لہڑی، میر مبارک خان محمدحسنی، احمد نواز بلوچ، شاہ خالد مینگل، خلیل احمد شادیزئی، سردارزادہ میر عبدالستار عمرانی، کامریڈ عبدالواحد پندرانی، قاری رحمت اللہ نقشبندی، حافظ حبیب احمد سلطانی، حافظ عبدالقدوس عباسی، کامریڈ علی اکبر دہوار وایلوفک اسیجائی ہلہلہ ئی پریس کانفرنس کرسا کریر۔ او پاریر کہ قلات اٹ جوڑ 50بیڈانا پرنس آغاعبدالکریم خان میموریل ہسپتال اٹ کورونا وائرس نا ناجوڑ آتیکن ہچ ءُ آسراتی اس اف‘ داڑاسکان ٹیسٹ کٹ ہم اف۔ قلات یخ ءُ علاقہ سے ہسپتال اٹ ایندھن نا ہچ آسراتی اف۔ یخ اٹ تو ساڑی ہسپتال نا کارندہ غاتے ہم مشکل مون تروئی تمک۔ او پاریر کہ الحمدلِلہ دا وخت اسکان قلات دا جہانی دَین آن رکھوک ءِ ‘ بننگ انگ ءِ کہ تفتان تون اوار ایلو علاقہ غاتے ٹی ساڑی کورونا غان زہمی ناجوڑ آتے قلات ہسپتال آ گدریفنگ نا ڈٹ بندی کننگ انگ ءِ ہراکہ قلات تون بیدادی اسے۔ خدا کَپ دن ءُ ناجوڑ اس قلات آ اتنگا تو ناجوڑ آن مست قلات نا ہسپتال اٹ ساڑی ڈاکٹر وایلو کارندہ ہرافک ہندی ءُ اوفک دانا گواچی مریرہ و مچ آعلاقہ زہمی مننگ کیک۔ نن قلات نا الس ءِ دا مشکل ساہت اٹ تنیا النگ کپنہ حکومت دا بابت فیصلے ءِ پدی ہَلے۔