کشاری فیڈر آتا بجلی ءِ بند کننگ بھلو بیداد اسے، نوشکے زمیندار

نوشکے : زمیندار ایکشن کمیٹی نوشکے نا ہنگامی دیوان ضلعی صدر میر محمد اعظم ماندائی نا کماشی ٹی اڈ ہلک۔ دیوان اٹ کشار گر تا بھلو کچ اس بشخ ہلک۔ دیوان آن زمیندار ایکشن کمیٹی نا ضلعی صدر میر محمد اعظم ماندائی، جنرل سیکرٹری حاجی شاہ زمان خان جمالدینی،مولوی عبدالصمد مینگل،حاجی نور احمد بلوچ،ملک عثمان جمالدینی،کے ڈی بلوچ،شیر احمد گورگیج،میر عارف بادینی و ایلوفک تران کرسا پاریر کہ کیسکو زمیندار ایکشن کمیٹی تون معاہدہ نا پورو خلاف ورزی کرسا کشاری خلقی فیڈر آتا بجلی ءِ بند کرسا بیدادی کننگ اٹی ءِ۔ ہرانا نن مذمت ءِ کینہ۔ کیسکو اسہ کنڈآ معاہدہ کننگ اٹی ءِ تو ایلو کنڈ آ بجلی ءِ بند کرینے۔ نوشکے نا کشار گرک ہر وخت بجلی بل و واجبات آتے وخت آ تننگ اٹی ءُ۔ اینو ہم نوشکے نا کشار گرک مچ آ بلوچستان اٹ کل آن زیات بجلی بل و واجبات تننگ اٹی ءِ۔ او بنجائی وزیر مملکت دیر و بجلی آ تنقید کرسا پارینے کہ اونا نااہلی آن ضلع نوشکے نا بجلی ءِ وار وار آ بند کننگ انگ ءِ اگہ بنجائی وزیر نااہل و ویل آتے ایسر کننگ نا لائخی تخپک تو او تینا عہدہ غان استیفہ ایتے۔ ولے کیسکو وار وار آ نوشکے نا کشار گر تے کروڑ آتا نسخان تننگ اٹی ءِ۔ او زمیندار ایکشن کمیٹی نا بنجائی اپیل آ پگہ بجلی ءِ بندی نا برخلاف پگہ 2 مارچ آ کوئٹہ تفتان قومی شاہراہ ءِ نوشکے اسٹیشن نا ہند آ بلاک کننگ نا پڑو ءِ کرے۔ ٹرانسپورٹر و مسافر آتیان خواست کرے کہ او کل قومی شاہراہ تیا سفر کننگ آن تینے بچفر و اوفتتون جوان کمک کیر تانکہ کشارگر تا برانز سرسہب مرے۔

(آن لائن)