خضدار نیام اٹ مننگ نا سوب آن کرونا نا بابت حساس ءُ علاقہ اسے، حافظ طاہر
Get real time updates directly on you device, subscribe now.
خضدار (آن لائن) کمشنر قلات ڈویژن حافظ محمد طاہر پارینے کہ قلات ڈویژن خاص وڑ اٹ خضدار نیام اٹ مننگ ناسوب آن حساس ءُ علاقہ سے‘ کورونا وائرس نا توننگ کن غٹ رکھی گام گیج آتے پورو کننگانے‘ ڈویژن نا غٹ ضلع غاتے ٹی کورونا وائرس آئسولیشن بنجا وخضدار لیویز ٹریننگ سینٹر و لیبر ہسپتال خضدار اٹ کرنٹائن سینٹر جوڑ کننگانے و اوفتے ٹی ڈاکٹر و طبی کارندہ و و ایمبولینس ساڑی ارے‘ دا وخت اسکان قلات ڈویژن اٹ کورونا نا اسہ زہمی اس ہم پیدوار متنے۔ دا خیال آتا درشانی ءِ او میڈیا نا نمائندہ غاتتون ہیت وگپ کرسا کرے۔ کمشنر قلات ڈویژن پارے کہ قلات ڈویژن خاص وڑ اٹ خضدار بلوچستان نا نیامی ءُ علاقہ سے داڑے ملک انا ایلو صوبہ غاتا بندغ آک گدرینگرہ ہندا سوب آن نان غٹ زموارآک مدام سنبرینگوک ءُ ‘ خدا نا شکر ءِ کہ دا وخت اسکان قلات ڈویژن اٹ کورونا وائرس نا اسہ کیس اس ہم رپورٹ متنے‘ قلات ڈویژن نا غٹ ضلع غاتے ٹی کورونا وائرس نا گمانی زہمی تیکن آئسولیشن وارڈ و لیویز ٹریننگ سینٹر و لیبر ہسپتال خضدار اٹ کرنٹائن سینٹر جوڑ کننگانے۔ کمشنر قلات ڈویژن حافظ محمد طاہر پارے کہ کورونا وائرس آن بچنگ آن اسٹ انگا کسر راجی رابطہ غاتے کم آن کم کننگ ءِ۔ اوڑدہی تے کم کننگ آن دا ناجوڑی آن بچنگ مریک۔