نیوزی لینڈ نا مسیت اٹ نمازی تے شہید کروک آ دہشتگرد ءِ مرک اسکان قید انا سزا

کرائسٹ چرچ(آن لائن) نیوزی لینڈ نا مسیت آتیٹی 51 نمازی تے شہید کروک آ  دہشتگرد برینڈن ٹیرنٹ ءِ مرک اسکان قید انا سزا بنفنگانے۔ درملکی خبررساں ادارہ نا رداٹ  نیوزی لینڈ نا شار کرائسٹ چرچ نا النور مسجد او لنووڈ اسلامک سینٹر اٹ سم کاری کرسا 51 نمازی تے شہید کروک آ دہشتگرد برینڈن ٹیرنٹ ءِ مرک اسکان قید انا سنا بنفنگانے۔ خبر ایجنسی نا رداٹ 29 سال نا  آسٹریلوی شاری برینڈن ٹیرنٹ اولیکو صحت دوبہ غان نمن مس ولے پد آن او دوبہ ءِ امنا کرے وخت اس کہ نیوزی لینڈ نا تاریخ اٹ اولیکو وار اسہ دوبہ دار اسے بیدس پیرول نا مرک اسکان قید انا سزا بنفنگانے۔ ایلو کنڈ آ نیوزی لینڈ نا وزیراعظم جسینڈا آرڈرن عدالتی فیصلہ ءِ جوان گوندا۔ او پارینے کہ دوبہ دار مرک اسکان قید او پورو وڑ اٹ چپی نا حقدار ءِ، زہمی تا دڑد کم مننگ کپک، او سماعت اٹی تینا جوزہ غاتا درشانی ءِ کرسا مسلمان آتا بہادری نا ہم ستا ءِ کرے، او پارینے کہ ہچ اس ہم نما دڑد ءِ کم کننگ کپک ولے کنے اومیت ءِ کہ دا ویل انا دے تیٹی نم دا محسوس کرینرے کہ نیوزی لینڈ نمے سینہ ٹی خلکنے او ہچ ءُ وخت اس ہم نمے تنہا الیتنے۔